Trajneri i Tiranës, Ardian Nuhiu, ka nisur përgatitjet intensive të skuadrës për sfidën e ardhshme kundër Flamurtarit në Vlorë. Ndonëse ndeshja është e planifikuar për ditët në vijim, stafi teknik ka vendosur që të përqendrohet që tani te aspektet themelore të lojës dhe koordinimi i lojtarëve në fushë.

FOKUSI TE BAZAT – Një nga pikat kryesore që Nuhiu po punon është teknika individuale e lojtarëve. Gjatë stërvitjeve, ai ka vendosur që të punohet me kontrollin e topit, pasimet e sakta, goditjet dhe pozicionimi në fushë. Qëllimi është që çdo lojtar të zotërojë elementet bazë, të jetë i sigurt në veprimet e tij dhe të kontribuojë në lojën kolektive. Minutat e para të seancës ishin të dedikuara për ushtrime teknike me topin, ku lojtarët përsëritën vazhdimisht pasimet në distanca të ndryshme, kontrollin e topit nën presion dhe manovrat e shpejta për të shpëtuar nga kundërsulmet. Trajneri Nuhiu i ka këshilluar lojtarët të punojnë me inteligjencë dhe refleks, duke marrë vendime të shpejta në çdo situatë.

PËRGATITJET TAKTIKE – Në fazën e dytë të stërvitjes, Nuhiu ka kaluar te taktika e skuadrës, duke punuar mbi pozicionimin në fushë, mbulimin e hapësirave dhe koordinimin mes reparti sulmues dhe mbrojtës. Ai kërkon që skuadra të jetë fleksibël dhe të reagojë shpejt ndaj ndryshimeve në lojë, sidomos kur Flamurtari do të tentojë kundërsulme të shpejta. Trajneri ka theksuar rëndësinë e mbrojtjes së zonave kritike dhe shfrytëzimin maksimal të çdo aksioni për të krijuar mundësi goli. Për këtë, janë kryer simulime ndeshjeje, ku lojtarët janë vendosur në situata reale që mund të ndodhin gjatë sfidës. Këto stërvitje kanë për qëllim të forcojnë bashkëpunimin dhe komunikimin mes lojtarëve.

MENTALITETI – Përveç aspektit teknik dhe taktik, Nuhiu po punon edhe me mentalitetin e lojtarëve. Ai kërkon nga skuadra që të tregojë karakter dhe përkushtim maksimal në çdo duel, duke mos u ndikuar nga presioni i tifozëve apo rivalëve. Trajneri beson se një ekip i fortë nuk është vetëm ai që ka aftësi teknike, por edhe ai që mban qetësi dhe fokus në situata të vështira. Gjithashtu, Nuhiu ka folur me lojtarët për rolet individuale dhe përgjegjësitë në fushë, duke u siguruar që çdo futbollist të kuptojë se çfarë pritet prej tij. Kjo qasje ndihmon që skuadra të funksionojë si një mekanizëm i përbashkët, ku çdo gabim individual mund të korrigjohet nga mbulimi i ekipit. Trajneri synon që Tirana të dalë nga Vlora me rezultat pozitiv, duke forcuar pozitat në renditje.

OLSI AVDIAJ-PANORAMASPORT.AL

---