Edicioni i parë i Lojërave të Përmirësuara, një ngjarje e hapur për sportistët që përdorin doping, do të përfshijë edhe notaren Megan Romano, katër herë kampione bote në not.Ajo është gruaja e parë që konfirmon pjesëmarrjen e saj në një ngjarje sportive që vazhdon të gjenerojë refuzim global dhe polemika të forta, sepse promovon përdorimin e steroideve, hormoneve të rritjes dhe substancave të tjera të ndaluara për sportistët.

34-vjeçarja nga Florida jo vetëm që bëhet atletja e parë e regjistruar për të garuar në kategorinë e femrave, por është edhe amerikane e parë. Ajo do të konkurrojë në garat 50 metra dhe 100 metra stil i lirë. Romano është katër herë kampione bote: ajo fitoi medaljen e artë në garat 4x100m të përziera dhe 4x100m stil i lirë në Kampionatin Botëror të vitit 2013 në Barcelonë dhe gjithashtu ka dy medalje ari në pista të shkurtra (4x100m dhe 4x200m stil i lirë në Stamboll 2012).

“Është një mundësi për të shtyrë kufijtë e performancës njerëzore në një mjedis transparent dhe të mbështetur shkencërisht, dhe për të garuar në një mjedis ku atletet femra vlerësohen dhe kompensohen në mënyrë të drejtë dhe të barabartë. Unë besoj se kjo është e ardhmja e sportit”, tha Romano. Të gjithë pjesëmarrësit në Lojërat e Përmirësuara (të dopuara) do të marrin një shumë fikse pjesëmarrjeje prej 500,000 dollarësh (432,000 euro) për secilin aktivitet, me çmime prej 1 milion dollarësh (862,577 euro) për këdo që thyen një rekord botëror në vrapimin 100 metra në atletikë ose në 50 metra stil i lirë në not.

“Të kesh një sportiste të kalibrit të Meganit që i bashkohet Lojërave të Përmirësuara është një hap monumental përpara”, tha Maksimilian Martin, zv.presidenti i eventit. “Vendimi i saj vërteton vizionin tonë për të krijuar një platformë ku potenciali atletik maksimizohet, festohet dhe shpërblehet në mënyrë të drejtë, pavarësisht nga gjinia apo prejardhja. Megan është vërtet një frymëzim dhe guximi i saj hap rrugën që shumë femra të tjera t’i bashkohen Lojërave të Përmirësuara”, shtoi ai. Një emër tjetër që ka qarkulluar prej kohësh është notari australian Xhejms Magnusen, i cili njoftoi pjesëmarrjen e tij me qëllim thyerjen e rekordeve të reja botërore.

ARRITJA E KULMIT TË AFTËSISË SPORTIVE Përballë kritikave, organizatorët mbrojnë përdorimin e substancave që rrisin performancën me argumente shkencore dhe ekonomike, duke pretenduar se eventi kërkon të përqafojë kapitalizmin, të ripërdorë infrastrukturën ekzistuese, t’i paguajë atletët në mënyrë të drejtë, të përqendrohet në sportet kryesore, të thyejë rekordet botërore dhe të promovojë përmirësimet. “Përmirësimet e performancës rrisin efektet e stërvitjes dhe i ndihmojnë atletët të arrijnë kulmin e vërtetë të aftësisë së tyre atletike”, argumentojnë organizatorët. Edicioni i parë i Lojërave të Përmirësuara është është planifikuar të mbahet në maj 2026 në Las Vegas dhe ideja është që të jetë një ngjarje vjetore. Këto lojëra do të përfshijnë pesë disiplina: atletikë, not, peshëngritje, gjimnastikë dhe sporte luftarake. Në të gjitha këto, sportistët mund të garojnë edhe nëse përdorin substanca dopuese që rrisin performancën.

“E PAPËRGJEGJSHME DHE E TURPSHME” Vitold Banka, president i Agjencisë Botërore Anti-Doping, përsëriti kundërshtimin e tij të vendosur ndaj këtij eventi alternativ në stilin olimpik që lejon përdorimin e drogave që rrisin performancën. “Është e papërgjegjshme dhe e turpshme”, u shpreh ai, duke u kërkuar autoriteteve amerikane ta parandalojnë këtë aktivitet. “Kërcënon të shkatërrojë dekada të tëra progresi në shëndetin publik, mbrojtjen e atletëve dhe vetë etikën e sportit”, deklaroi Vitold Banka. Organizatorët e Lojërave të Dopuara kanë mbështetjen e kapitalistëve sipërmarrës si Donald Tramp Jr., djali i presidentit të SHBAve, Donald Tramp.ARTIN LLESHAJ-PANORAMASPORT.AL

---