Komenton rikthimin e Nojer, Bauman: Nuk ishte një ndjenjë e këndshme
Oliver Bauman i Hofenhajm mbrojti portën e kombëtares gjermane në nëntë nga dhjetë ndeshjet e fundit. Në moshën 36 vjeçare, portieri dukej se më në fund kishte siguruar jo vetëm pjesëmarrjen e tij të parë në një turne madhor, por edhe vendin e titullarit. Megjithatë, trajneri i Gjermanisë, Julian Nagelsman, riktheu Manuel Nojerin, i cili ishte tërhequr nga kombëtarja pas eliminimit të Gjermanisë në Euro 2024.
Tani, Bauman ka reaguar ndaj këtij vendimi të papritur. Kombëtarja gjermane fitoi ndeshjen e fundit miqësore përpara Kupës së Botës ndaj bashkëorganizatorëve të SHBA me rezultatin 2-1 të shtunën në mbrëmje në Çikago. Oliver Bauman ishte sërish në portën e ekipit kombëtar, por në testin e vërtetë kundër Curaçaos më 14 qershor do të zëvendësohet nga Manuel Nojer. Pas miqësores së fundit, Bauman foli për ndjenjat e tij.
“Në fillim ishte e vështirë, sigurisht. Nuk ishte aspak një ndjenjë e këndshme,” pranoi Bauman. “Por menjëherë e kisha të qartë se do të isha aty për ekipin dhe do të udhëtoja me ta. As nuk më shkoi në mendje të mos vija,” theksoi veterani. Se vendimi i minutës së fundit i Nagelsman nuk e kishte lënë krejtësisht të paprekur emocionalisht, Bauman nuk mundi ta fshihte plotësisht. Kur u pyet se çfarë nënkuptonte me “jo fort e këndshme”, kapiteni i Hofenhajm u përgjigj:
“Do të preferoja ta lija me kaq dhe të mos hyja në më shumë detaje. Situata është ajo që është.” Ai shtoi se tani është plotësisht i përqendruar te kombëtarja dhe shpreson për një Kupë Bote të suksesshme. Nga ana tjetër, Nojeri nuk mendon se rikthimi i tij ka dëmtuar marrëdhënien mes tyre. “Marrëdhënia jonë është ende e mirë,” shpjegoi Bauman. “Ai do t’i bashkohet stërvitjes me ekipin sapo të mbërrijmë në Uinston-Salem, ky është plani, dhe më pas do të luaj kundër Curaçaos,” konfirmoi Nagelsman për kampionin e botës të vitit 2014. Trajneri pati gjithashtu fjalë vlerësuese për Bauman: “Ai është një lojtar i shkëlqyer, e vendosi skuadrën përpara vetes. Javët e fundit nuk kanë qenë të lehta për të. Meriton një kompliment të madh.”
PANORAMASPORT.AL
