Federata e Futbollit të Maqedonisë së Veriut ka nisur kërkimet për trajnerin që do të zëvendësojë Blagoja Milevskin. Në skenë së fundmi ka dalë emri ish-trajnerit të Vllaznisë, Goçe Sedloski, i cili aktualisht drejton Vardarin, në elitën e futbollit maqedonas.

Sedloski shihet si njeriu i preferuar nga presidenti Masar Omeragic. Ai ka fituar Kupën me Vardarin si dhe 2 kampionate po me Vardarin dhe një me Shkupin, dhe gëzon marrëdhënie shumë të ngushta personale si me Presidentin Omeragic, ashtu edhe me Drejtorin Sportiv Goran Pandev.

Vlen të theksohet fakti se në sezonin 2022/23, 51-vjeçari, drejtoi Vllazninë në 11 duele, por pa mundur të lerë gjurmë.

Maqedonasi u emërua më 4 prill të vitit 2023, teksa përfundoi aventurën e tij me shkodranët më 30 qershor 2023.

Kujtojmë që Maqedonia e Veriut, do të jetë pjesë e “play off”-it të Botërorit  2026, teksa siguroi një biletë nga Liga e Kombeve, duke u pozicionuar në vazon e katërt.

ILDI MEROLLI – PANORAMASPORT.AL

---