Shorti i Ligës së Konferencës ka vendosur Dinamon përballë klubit kazak të Astana. Një skuadër e cila ka histori në Europë në vitet e fundit dhe zakonisht ka një mbështetje të fortë financiare. Por tani duket se vetë kazakët po përballen me probleme financiare, siç ka shpjeguar trajneri tyre Grigori Babajan.

Duke komentuar shortin, ai ka kujtuar se Dinamo ka shumë cilësi, teksa njeh mirë Ilir Dajën të cilin e ka përballur në vitet kur drejtonte Ballkanin. Ai shpjegoi gjithashtu se cilët ishin problemet e mëdha me të cilat do të përballej Asana para takimit të dyfishtë me dinamovitët.

“Kemi një kundërshtar shumë të vështirë. Dinamo është një nga klubet më të njohura të Shqipërisë, me tradita të forta dhe një histori të gjatë. Sezonin e kaluar fitoi Kupën e Shqipërisë dhe ka një numër të madh lojtarësh të huaj dhe lojtarësh me eksperiencë. Ekipi drejtohet nga një trajner i kualifikuar, të cilin e kemi takuar tashmë kur luajtëm kundër Ballkanit. Ekipet e tij janë gjithmonë të organizuara mirë dhe taktikisht të forta.

Ne i respektojmë kundërshtarët tanë dhe e kuptojmë se nuk ka ndeshje të lehta në këtë fazë. Por kalendari nuk do të jetë më pak sfidues për ne. Pas ndeshjes së kampionatit të Kazakistanit, do të na duhet të udhëtojmë për në Shqipëri për gati 24 orë me fluturime të rregullta, pastaj të fluturojmë përsëri dhe pastaj të luajmë një ndeshje tjetër kampionati dy ditë më vonë, e ndjekur nga ndeshja e kthimit në garën europiane.

Jemi përballur me një kalendar të ngjashëm në dy vitet e fundit, por atëherë kishim një skuadër më të zgjeruar dhe mund ta kompensonim atë përmes rotacionit. Sot, situata është e ndryshme. Për shkak të vështirësive financiare, rreth tetë lojtarë janë larguar nga ekipi dhe thellësia e skuadrës është zvogëluar ndjeshëm.

Aktualisht jemi të detyruar të marrim lojtarë të rinj. Shumë prej tyre nuk janë ende gati për këtë nivel, por situata aktuale dhe mungesa e lojtarëve na kërkojnë ta përshpejtojmë këtë proces.

Megjithatë, nuk po gjejmë justifikime. Ne ende jetojmë me shpresë dhe besojmë se klubi nuk do të injorohet. Shpresojmë që ekipi së shpejti të gjejë një investitor dhe mundësi shtesë për të forcuar listën. Ka ende kohë para fillimit të Ligës së Konferencës dhe ne do të donim të forconim të paktën dy ose tre pozicione. Por duhet të kuptojmë se çdo lojtar i ri ka nevojë për kohë për t’u përshtatur dhe për të hyrë në formën optimale, dhe ne praktikisht nuk kemi kohë.

Sido që të jetë, ne do të bëjmë gjithçka që është e mundur për të përfaqësuar Kazakistanin me dinjitet në garat europiane. Ekipi do të përpiqet t’i kënaqë tifozët tanë, të cilët na kanë mbështetur gjatë kësaj kohe të vështirë. Jam i bindur se karakteri, përkushtimi dhe organizimi do të na ndihmojnë të kalojmë këtë periudhë të vështirë të sezonit”, tha Babajan.

E.KUKA-PANORAMASPORT.AL

---