Renditja e 20 lojtarëve më të vlerësuar sipas notës mesatare “Sofascore” tregon një kampionat shumë të ekuilibruar. Diferencat mes performancave individuale janë të vogla dhe ku ndikimi i lojtarëve vlerësohet në shumë aspekte të lojës, jo vetëm te golat apo asistet. Shumica e lojtarëve janë të grumbulluar në intervalin 7.12–7.57, çka tregon një nivel relativisht të qëndrueshëm dhe konkurrues në elitën e kampionatit.

KRYESUESI – Në krye të listës qëndron Dejvi Bregu i Dinamos, me notën më të lartë 7.57, duke u dalluar qartë nga pjesa tjetër e renditjes. Ai ka qenë një nga lojtarët më produktivë ofensivisht, me 10 gola dhe 9 asiste, por mbi të gjitha ka pasur ndikim të vazhdueshëm në ndërtimin e lojës dhe në momentet vendimtare të ndeshjeve.

Performanca e tij e qëndrueshme e vendos si referencë të sezonit. Në vendin e dytë gjendet Fernando Medeiros i Egnatias me 7.36, një lojtar që ka spikatur më shumë në stabilitetin e mesfushës dhe balancimin e lojës së ekipit. Edhe pse nuk ka statistika të larta sulmuese, kontributi i tij në kontrollin e ritmit dhe në mbrojtje ka qenë vendimtar.

“OUTSIDER” – Në pozicionet 3 dhe 4 renditen Lorenc Trashi (Flamurtari) dhe Visar Bekaj (Tirana) me nga 7.28. Trashi ka treguar një profi l shumë dinamik, me 94 driblime të sakta dhe 6 asiste, duke qenë një nga lojtarët më të rrezikshëm në krah.

Nga ana tjetër, Bekaj si portier ka arritur këtë notë falë qëndrueshmërisë dhe sigurisë së treguar në portë, ku përqindja e pasimeve dhe vendimmarrja kanë ndikuar ndjeshëm në vlerësimin e tij. Më poshtë në renditje, por ende me nota shumë të larta, gjenden lojtarë që kanë pasur ndikim të madh në skuadrat e tyre. Erdenis Gurishta i Vllaznisë (7.22) ka qenë i rëndësishëm në mbrojtje dhe në fazën ndërtuese.

Xhonatan Lajthia i Elbasanit (7.20) spikat si një nga lojtarët më të rëndësishëm ofensivë me 9 gola dhe 121 driblime të sakta, një shifër që tregon aftësi individuale shumë të larta. Karim Lukili (7.20) ka kontribuar me kreativitet dhe asistime, ndërsa Fredi Alvarez (7.19) ka qenë një nga lojtarët më të qëndrueshëm të Tiranës në mesfushë.

Në të njëjtin nivel qëndron edhe Bernard Karrica i Vorës (7.19), i cili ka pasur një rol të rëndësishëm në sulm me 7 gola dhe paraqitje të vazhdueshme. Në pjesën e mesme të tabelës gjejmë edhe André Teikseira (Dinamo), Angelo Tafas (Tirana) dhe Romeo Harizaj (Vora), të cilët megjithëse nuk kanë statistika të mëdha në gola apo asiste, kanë ruajtur nota të larta falë stabilitetit dhe efektivitetit në rolet e tyre specifi ke.

E VEÇANTA – Një pjesë interesante e kësaj renditjeje është fakti se edhe lojtarët me statistika të ndryshme arrijnë nota shumë të afërta. Për shembull, disa lojtarë me shumë gola si Erald Maksuti (12 gola) dhe Irgi Kasalla (13 gola) kanë nota rreth 7.14, ndërsa lojtarë me më pak gola por me stabilitet të lartë në pasime apo mbrojtje janë shumë pranë tyre në vlerësim.

Kjo tregon se Sofascore vlerëson një kombinim të gjerë faktorësh dhe jo vetëm produktivitetin fi nal. Në fund të listës së 20-shes, lojtarë si Albano Aleksi (7.12), Esat Mala (7.12) dhe Alessandro Albanese (7.12) mbeten ende në një nivel shumë të respektueshëm, duke treguar se edhe pjesa e poshtme e kësaj renditjeje përfaqëson lojtarë me ndikim real në kampionat.

KLUBET – Në aspektin ekipor vihet re se Dinamo ka lojtarin më të vlerësuar të kampionatit dhe një tjetër në top 10, çka tregon një nivel të lartë individual në skuadër. Elbasani dhe Tirana kanë disa lojtarë të shpërndarë në mënyrë të barabartë në renditje, duke treguar thellësi në organikë. Ndërsa Vora, Vllaznia dhe Egnatia kanë gjithashtu përfaqësim të fortë, por pa dominim të qartë individual.

VLADIMIR MEMA – PANORAMASPORT.AL

---