Sandro Tonali ka të ngjarë t’i shpëtojë një pezullimi shtesë për vendosje bastesh, pavarësisht se është goditur me 50 akuza të reja për baste në ndeshjet e futbollit pas transferimit të tij te Njukasëlli. Mesfushori i Italisë po vuan aktualisht një pezullim 10-mujor, i cili përfundon më 27 gusht, pasi ai pranoi se kishte thyer rregullat e kumarit në vendin e tij.

Tonali, i cili u bashkua me “qymyrxhinjtë” për 52 milionë paund nga Milani në korrik, u pezullua ndërkombëtarisht nga autoritetet italiane në tetor. Por Federata Angleze e Futbollit më pas nisi hetimin nga ana e saj dhe ata tani kanë konfirmuar se 23-vjeçari ka vijuar të vendosë baste 50 herë midis 12 gushtit dhe 12 tetorit të vitit të kaluar.

Tonali bëri debutimin e tij me Njukasëllin më 12 gusht, duke shënuar në një fitore 5-1 ndaj Aston Vilës, dhe u mor në pyetje për herë të parë në Itali më 12 tetor. Ai më vonë u tha hetuesve se kishte një varësi nga bixhozi. Tonali ka bashkëpunuar me FA gjatë kësaj kohe dhe ka dorëzuar të gjitha materialet në lidhje me hetimin e tyre në nëntor.

Kjo çoi në frikën brenda “St James’ Park” se blerja më e rëndësishme e merkatos së tyre të verës mund të mungonte për një periudhë përtej gushtit. Megjithatë, “Mail Sport” zbulon se Njukasëlli pret që FA t’i trajtojë akuzat e reja si një periudhë të vetme vendosje bastesh, duke përfshirë shkeljet në Itali – që do të thotë se çdo dënim do të kryhet njëkohësisht.

PANORAMASPORT.AL

NDIQE LIVE "PANORAMA TV"

---