“Me orkestrën e tij kompozoi perla të pavdekshme”, Ballkani rinovon me Ilir Dajën: Do vazhdojmë të shkruajmë faqet e historisë
Klubi i Ballkanit nuk ka pritur verën për të marrë vendimin për të ardhmen e Ilir Dajës. Klubi kampion i Kosovës, i shpallur dy sezone radhazi pikërisht nën drejtimin e trajnerit shqiptar, ka vendosur t’i rinovojë kontratën atij.
Ka qenë pikërisht klubi, nëpërmjet një postimi në rrjetet sociale, që ka bërë të ditur se ka gjetur akordin dhe është firmosur marrëveshja për zgjatjen e kontratës deri në vitin 2026, duke vazhduar punën që është shoqëruar deri tani me dy pjesëmarrje radhazi në fazën në grupe të Ligës së Konferencës.
NJOFTIMI I BALLKANIT
Ne ia kemi besuar dirigjencën e “simfonisë” tonë.
Ai me “orkestrën” e tij, kompozoi perla të pavdekshme, të cilat tashmë janë gdhendur në partiturat e historisë.
Ne i kemi besuar të na prijë betejave.
Ai me “kalorësit” e tij, ngriti fronin e lavdisë!
Andaj ai padyshim që mbetet njëri prej nesh
Zonja dhe zotërinj, tifozë të kampionit të Kosovës, me kënaqësinë më të madhe ju njoftojmë se me maestron e fushës së blertë, me profesorin e nderuar, Ilir Daja, kemi vazhduar deri në vitin 2026.
Bashkë kemi nisur t’i shkruajmë faqet e historisë së futbollit tonë, bashkë do t’i vazhdojmë!
Na priftë e mbara!
PANORAMASPORT.AL
NDIQE LIVE "PANORAMA TV"