Kastrioti mbylli një vit plot probleme. Skuadra nuk ka treguar ndonjë potencial në këto 16 javë të luajtura dhe renditja është dëshmia më e mirë. Janë pozicionuar të 8-ët, me vetëm 15 pikë. Një bilanc aspak i kënaqshëm dhe sidomos për një ekip që vjen nga elita.

E megjithatë, pritshmëritë nuk është se ishin më të larta. Nga një grup totalisht i rinovuar, ku rezistuan vetëm 5-6 lojtarë, nuk mund të prisje më shumë. Edhe pse Ramadan Ndreu u mundua që të ndërtonte një ekip cilësor, që të paktën të mos diskutojë qëndrimin në Kategorinë e Parë, hera-herës kanë pasur luhatje. Të vendosur para kësaj situate, janari shihet si shpresa e vetme.

Pritet që të ndërhyjnë në merkato dhe forcojnë organikën për të përballuar pjesën e mbetur të garës. Klubi është gati që t’i përmbushë kërkesat trajnerit, i cili po i bën llogaritë me të paktën katër përforcime. Me urgjencë duhet një sulmues, një repart që ka pasur shpesh probleme.

Fausto Silvera da Silva Xhonatan u largua që në nëntor pa lënë gjurmë (mësohet se është kthyer në Brazil, ndonëse pa lejen e klubit), drejtuesit do të jenë të detyruar që ta zëvendësojnë. Një lojtar goli është domosdoshmëri dhe sidomos në një ekip që ka shënuar vetëm 14 gola në total.

SHKËLQIM HASANI – PANORAMASPORT.AL

NDIQE LIVE "PANORAMA TV"

---