“Divorci” me Partizanin, Franko Lerda takon ekipin në hotel para largimit
Franko Lerda nuk është më trajneri i Partizanit, vendim të cilin e ka marrë presidenti Gaz Demi një ditë pas humbjes në derbin e 13 dhjetorit. Trajneri italian, i kalitur me situata të tilla, pasi në karrierën e tij nuk ka pasur jetëgjatësi në pankinat që ka drejtuar, është dukur i qetë gjatë ditës së djeshme.
52-vjeçari nuk është larguar drejt Italisë pa u takuar me ekipin dhe stafin. Gjatë paradites së djeshme Lerda, i shoqëruar nga dy djemtë e tij, që kishin ardhur për të parë derbin, dhe dy ndihmësit, Kini e Kofano, ka shkuar në hotelin e klubit ku është takuar me lojtarët dhe stafin.
Për disa minuta italiani ka biseduar me lojtarët dhe është përshëndetur me të gjithë dhe u ka uruar suksese. Para largimit ai është ndarë përzemërsisht edhe me stafin mjekësor dhe ndihmësin shqiptar, Reinaldo Kalari, madje duke i dorëzuar edhe stafetën në drejtimin ekipit. Lerda është larguar me buzëqeshje e përshëndetje, por natyrisht me një brengë që nuk e përmbushi misionin te Partizani.
PANORAMASPORT.AL
NDIQE LIVE "PANORAMA TV"