Kaosi ka pushtuar futbollin shqiptar, pikërisht në dy javët e fundit të Final Four. Federata Shqiptare e Futbollit njoftoi dje papritur, që mund të ketë ndryshim axhende.

Kështu nëse titulli do të mbetet për t’u vendosur vetëm mes Vllaznisë dhe Elbasanit, asgjë nuk do ndryshojë. Në të kundërt, Egnatia-Dinamo do të zhvendoset në “Elbasan Arena” më 31 maj.

Asgjë nuk është vendosur përfundimisht. Fillimisht duhet pritur sfida Vllaznia-Egnatia, ku vetëm nëse fitojnë kuqeblutë mund të konfirmohet se do të ndiqet axhenda e mëparshme. Fitorja e Vllaznisë do të bënte që Egnatia dhe Dinamo të mos kishin shpresa për titullin kampion.

Paradoski qëndron te fakti se biletat vazhdojnë të shiten për sfidën Egnatia-Dinamo, por sikur ndeshja do të luhet në stadiumin “Air Albania”. Mbetet për t’u mësuar si do e zgjidhë FSHF, nëse do të jetë nevoja, pikërisht çështjen që lidhet me tifozët.

EMANUEL LOCI-PANORAMASPORT.AL

---