Kjo Kupë Bote ka dhuruar tashmë pjesën e saj të emocioneve, surprizave dhe marrëdhënieve të tensionuara, me përplasjen më të fundit që erdhi gjatë fitores së Spanjës ndaj Portugalisë, ku ish-shokët e skuadrës te Mançester Siti, Rodri dhe Bernardo Silva, u përfshinë në një debat të nxehtë.

Pasi Silva humbi një mundësi të vonshme për të barazuar rezultatin, Rodri festoi pranë ishshokut të tij të skuadrës, i cili ishte i shtrirë në fushë, duke shkaktuar reagimin e zemëruar të mesfushorit portugez. Dhe kjo mund të mos jetë miqësia e fundit që vihet në provë nga futbolli i Kupës së Botës. Sfida e radhës për Anglinë është Norvegjia në Majami të shtunën mbrëma, ku Xhud Bellingam do të shpresojë që miqësia e tij e ngushtë me Erling Halandin të mbetet e paprekur, pavarësisht rëndësisë së jashtëzakonshme të ndeshjes.

Dyshja krijoi një lidhje të fortë gjatë kohës së tyre së bashku te Borusia Dortmund, kur Bellingam mbërriti në Gjermani si adoleshent në vitin 2020 nga Birmingam Siti. Haland, i cili ishte bashkuar me Dortmundin në mesin e sezonit paraardhës, kishte krijuar tashmë emrin e tij si një makineri golash, një reputacion që u vulos me një tregolësh vetëm 23 minuta pas debutimit të tij. Kur Bellingam mbërriti, të dy shpërthyen së bashku në fushë, me anglezin që shërbente si motori i mesfushës pas fuqisë së pandalshme shënuese të Haalandit. Së bashku ata luajtën 46 ndeshje në Bundesligë, duke ndarë 3150 minuta në fushë.

Xhud Bellingam i dha pesë herë asist Halandit. Në ato 46 ndeshje, Dortmundi kishte një mesatare prej 1.97 golash të pritshëm për ndeshje, krahasuar me 1.92 në 22 ndeshje ku njëri prej tyre ose asnjëri nuk ishte në formacion. Ata zhvilluan gjithashtu një miqësi plot humor jashtë fushës, me shumë tifozë që përqafuan atë që u quajt “bromanca” mes tyre. Edhe pse partneriteti i tyre futbollistik zgjati vetëm dy sezone, marrëdhënia personale vazhdoi edhe pas transferimit të Halandit te Mançester Siti në vitin 2022 dhe kalimit të Bellingamit te Real Madridi një vit më vonë. Dy lojtarët shihen shpesh duke u takuar pas ndeshjeve të Champions League mes skuadrave të tyre, ndërsa në vitin 2024 u raportua se Bellingam po përpiqej ta bindte sulmuesin norvegjez që të bashkohej me të në “Santiago Bernabeu”.

Sipas gazetës spanjolle “AS” në atë kohë, Bellingam i kishte treguar Halandit se sa e jashtëzakonshme ishte të luaje për Real Madridin para një stadiumi të mbushur plot pas rinovimit të tij. Ai gjithashtu kishte folur me entuziazëm për profesionalizmin e klubit, qendrën stërvitore dhe përvojën e të luajturit nën drejtimin e ish-trajnerit Karlo Ançeloti. Në janar 2025, Haland zgjodhi të qëndronte te klubi anglez ku kishte arritur kaq shumë sukses, duke nënshkruar një kontratë rekord prej nëntë vitesh e gjysmë që e mban në Mançester deri në vitin 2034.

Haland ka qenë një nga lojtarët më të rëndësishëm të këtij turneu, duke shënuar të dy golat në fitoren e Norvegjisë ndaj Brazilit në fazën e 1/8-ave, si dhe golin vendimtar në minutat e fundit në triumfin e raundit të 32-shes kundër Bregut të Fildishtë. Shtatë golat e tij e mbajnë fort në garën për “Këpucën e Artë”, së bashku me Kilian Mbapenë dhe Lionel Mesin. Bellingam gjithashtu ka qenë vendimtar në rrugëtimin e Anglisë drejt çerekfinaleve, duke shënuar dy gola brenda dy minutash në fitoren 3- 2 ndaj Meksikës në fillim të kësaj jave. Dopieta e Halandit kundër Brazilit rikonfirmoi statusin e tij si një nga sulmuesit më vdekjeprurës në botë.

25-vjeçari ka shënuar 62 gola në 54 ndeshje me kombëtaren norvegjeze, me një mesatare prej një goli çdo 71 minuta. Edhe më mbresëlënëse është se vetëm gjashtë prej këtyre golave kanë ardhur nga pika e bardhë e penalltisë. Po ashtu, Bellingam ka qenë një nga shtyllat e suksesit të Anglisë në këtë Botëror, duke dhënë kontribut të madh në rrugën drejt katër më të mirave. Dhe e shtuna premton një përballje spektakolare mes dy miqve të vjetër, me Miamin që do të bëhet skena e një dueli mes një Norvegjie të dëshpëruar për të arritur për herë të parë në historinë e saj një gjysmëfinale të Kupës së Botës dhe një skuadre të drejtuar nga Tomas Tuhel, që kërkon paraqitjen e parë të Anglisë në katër më të mirat që nga viti 2018.

PANORAMASPORT.AL

---