Partizani dhe Renaldo Kalari kanë ndarë rrugët, ndërsa “Panorama Sport” mëson se ka vazhduar te Dinamo. Ishin plot 10 vite rrugëtim, që nisën fillimisht si lojtar dhe përfunduan si trajner i ekipit B. Vetë Kalari ka kërkuar largimin, pasi dëshiron të vazhdojë si ndihmës i Ilir Dajës. Kështu është bërë pjesë e Dinamos tashmë, ndërsa po afron ndeshja e turit të dytë të Ligës së Konferencës.

Vendimi i Kalarit u pranua nga Partizani, që ndërkohë do të vazhdojë me projektin e Partizanit B në Kategorinë e Dytë. Të kuqtë janë në kërkim të trajnerit të ri. Dhe duhet të jetë dikush që ia del të menaxhojë si duhet brezin e ri, elementë që mund të bëjnë mirë më pas edhe në ekipin e parë, si dhe vështirësitë e kategorive inferiore.

KALARI- Kalari vendosi ta mbyllë karrierën si futbollist pikërisht te Partizani. Dhe për të ishte në mënyrën më të bukur, pasi fitoi titullin kampion me klubin e kuq që i dha fund 26 viteve pritje. Ishte rikthim për Kalarin me të kuqtë në vitin 2015.

Pjesën më të madhe të karrierës e kaloi me të kuqtë. Për këtë edhe zgjodhi të vazhdonte në stafet e kryeqytetasve. Në një moment të vështirë, kur Partizani mbeti pa trajner, Kalari u mbajt përkohësisht në krye për disa javë. Si trajner te moshat dhe po ashtu ndihmës në ekipin e parë, puna e Kalarit u vlerësua. Ish-mbrojtësi ia doli që të shpërblejë besimin e klubit, duke ngjitur ekipin B në Kategorinë e Dytë. Sezoni i kaluar ishte i pari pas rikthimit në aktivitet.

PARTIZANI B- Të kuqtë kanë një sy tek ekipi B, që akoma nuk i ka filluar përgatitjet e sezonit të ri. Nisja e Kategorisë së Dytë në shtator e jep këtë mundësi. Më pas objektiv do të mbetet ngjitja e një tjetër kategorie. Fillimisht kërkohet që të ruhet shumica e skuadrës së sezonit të kaluar, që solli dhe suksesin. Më pas besimi qëndron që mund të pasojnë suksese të tjera, dhe pse vështirësia shtohet dhe misioni nuk duket aspak i lehtë.

EMANUEL LOCI-PANORAMASPORT.AL

---