Dinamo ndihet e vjedhur. Pas humbjes 2-1 ndaj Vllaznisë, Dinamo ka zgjedhur të reagojë publikisht me një qëndrim krenar dhe të vendosur.Në një postim në rrjetet sociale, klubi theksoi: “E mbyllim me kokën lart, se jemi më të mirët!”, një deklaratë që synon të forcojë moralin e lojtarëve dhe të tifozëve, pavarësisht rezultatit zhgënjyes.

Kjo deklaratë nuk është vetëm një shprehje emocionale pas humbjes, por edhe një mesazh. Së pari, ajo vjen si një mënyrë për të ruajtur unitetin dhe krenarinë brenda klubit, duke theksuar performancën dhe përpjekjen e skuadrës gjatë gjithë sezonit. Së dyti, përmban një notë kritike ndaj mënyrës se si u menaxhua ndeshja nga gjyqtari. Dinamo ka lëshuar akuza të qarta ndaj arbitrimit, duke pohuar se disa vendime vendimtare ndikuan në rrjedhën e lojës dhe përfundimisht në rezultatin përfundimtar.

Sipas klubit, Vllaznia ka përfituar nga disa vendime të dyshimta, çka ka shkaktuar reagime të forta jo vetëm nga drejtuesit e Dinamos, por edhe nga tifozët në rrjete sociale. Ky është një rast tipik në futboll, ku emocionet, krenaria dhe kontestimi i vendimeve të arbitrave përzihen në mënyrë të natyrshme, veçanërisht kur bëhet fjalë për ndeshje me peshë. Dinamo, pavarësisht zhgënjimit, e mbyll sezonin me bindjen se ka ndërtuar një skuadër konkurruese dhe me perspektivë, e cila do të vazhdojë të synojë suksese në turet kualifikuese të Europës, të cilat pritet të nisin në muajin korrik. Dinamo do të rikthehet pas shumë vitesh në një aventurë të tillë.

AKUZAT Dinamo u mposht pas 90 minutave nga Vllaznia, me këta të fundit që fituan 2 penallti në pjesën e parë, ndërkohë në ambientin blu e kanë me gjykimin. Diçka e tillë ka bërë që ata të reagojnë ashpër pas ndeshjes, si në ofendime të drejtpërdrejta ndaj gjyqtarëve, po ashtu edhe në deklaratat që dhanë për mediat. Në fjalën e tij, trajneri Ilir Daja akuzoi gjyqtarin Eldorjan Hamiti, se ishte ai shkaktari kryesor i eliminimit të skuadrës së tij.

Daja kishte pretendime për një penallti në pjesën e parë, e cila me standardin e vendosur nga kryesori, sipas tij duhet të akordohej. Po ashtu, edhe drejtori Ermal Barushi pas ndeshjes foli për penalltitë e dhëna nga Hamiti, duke kujtuar se edhe ai vjen nga fusha e arbitrimit. Gjithashtu, drejtori i bluve shprehu rezerva edhe për Juxhin Xhajën, ndërkombëtari i cili ishte në sistemin VAR.

PANORAMASPORT.AL

---