Katër italianë dhe një portugez në gjashtë vite, trajnerët e huaj dështim për Partizanin
Gjatë epokës “Demi”, Partizani është drejtuar nga pesë trajnerë të huaj, 4 prej tyre italianë. Me asnjërin prej tyre klubi nuk arriti të kishte vazhdimësi, duke mos shkuar më shumë se një gjysmë sezoni.
Është thënë prej kohësh se eksperienca e trajnerëve të huaj te Partizani ka rezultuar dështim, shpresohet që rasti “Lerda” t’i ketë bindur drejtuesit për të besuar më shumë te trajnerët shqiptarë, siç ishte vjet Skënder Gega, i cili ktheu titullin kampion pas një mungese 26-vjeçare.
MARCIO SAMPAIO: (9 shkurt 2014 – 4 maj 2014). Dështoi në sigurimin e një bilete europiane me Partizanin, që mbylli sezonin në vendin e pestë.
ANDREA AGOSTINELI: (4 janar 2016 – 31 maj 2016). E mori ekipin në vend të dytë dhe nuk arriti të fitojë betejën e titullit me Skënderbeun.
ADOLFO SORMANI: (1 korrik 2016- 10 tetor 2016). Me Sormanin suksesi ishte në Europë, ku eliminuan Ferencavroshin në Champions dhe shkuan deri në fazën “play off” në Ligën e Europës. Në kampionat e drejtoi ekipin 5 javë, me 2 fitore, 2 barazime dhe u largua pas humbjes me Kukësin.
MARK IULIANO: (26 korrik 2018-5 nëntor 2017). Ish-mbrojtësi juventin e drejtoi ekipin në fazën e parë, ku arriti 3 fitore, 2 barazime dhe 4 humbje, me golavarazh: 5-7. Nën drejtimin e Iulianos, Partizani e mbylli fazën e parë në vendin e gjashtë.
FRANKO LERDA: (17 qershor 2019 – 14 dhjetor 2019). Ish-sulmuesi i Torinos mori në drejtim një ekip kampion, por në vend që të rriste nivelin e lojës dhe paraqitjen, Franko Lerda do të mbahet mend vetëm për problematikat dhe përplasjet e shumta që ka krijuar në skuadër. E nisi mirë në Europë, por me luhatje.
Më pas aventurën në futbollin shqiptar e nisi me fitimin e Superkupës, por në startin e kampionatit Kukësi i merr hakun Partizanit të Lerdës. Pas javës së 13-të të kuqtë kryesonin me katër pikë para Kukësit, por pas humbjes në Ballsh vjen disfata në derbi, që me formacionin eksperimental vulosi edhe fatin e Franko Lerdës, i cili e ka mbyllur aventurën me “demat”.
PANORAMASPORT.AL
NDIQE LIVE "PANORAMA TV"