“Tirana duhet të mund Flamurtarin dhe të kthehet te fitorja”. Ky është ultimatumi, në një farë mënyre i drejtuesve të skuadrës në prag të sfidës që bardheblutë do të zhvillojnë me Flamurtarin. Presidenti Refik Halili ka qenë i qartë ndaj drejtuesve të ekipit. Këtë ndeshje nuk lejohen gabimet. Kjo, sepse situata te Tirana është e nderë dhe një tjetër humbje komplikon gjithçka, madje rrezikon që skuadrën kryeqytetase ta lërë pa trajner.

Që nga fitorja e fundit e Tiranës në kampionat më 3 tetor 2025 ndaj Partizanit me rezultatin 3-0, kanë kaluar plot 52 ditë pa sukses në kampionat. Gjatë kësaj periudhe, skuadra bardheblu ka regjistruar 4 humbje dhe një barazim, duke hasur vështirësi për të rikthyer ritmin e duhur dhe për të siguruar rezultatet e pritura. Kjo periudhë e gjatë pa fitore ka ndikuar dukshëm edhe në moralin e lojtarëve, të cilët përballen me presionin e vazhdueshëm për të dhënë më të mirën në fushë.

Trajneri i ri ka eksperimentuar me formacione të ndryshme dhe ka kërkuar alternativa në të gjithë repartet e skuadrës, por ende nuk ka arritur të kapërcejë krizën e rezultateve. Çdo ndeshje e ardhshme është me rëndësi të madhe, jo vetëm për pikët e kampionatit, por edhe për të rikthyer besimin dhe motivimin brenda grupit të lojtarëve. Një fitore e parë pas këtij vakumi do të shërbente si një impuls i madh për ekipin, duke i dhënë mundësinë Tiranës të rifitojë vetëbesimin dhe të synojë rezultate më të qëndrueshme në pjesën e mbetur të sezonit.

Formacioni – Tirana zbret në fushë ndaj Flamurtarit me një formacion ndryshe. Ky është rreshtimi i tretë radhazi i përdorur nga trajneri Ardian Nuhiu në tre ndeshje, ndërsa dy takimet e para me skema të tjera përfunduan me humbje 0-2, ndaj Bylisit dhe Vorës. Kjo e bën sfidën ndaj Flamurtarit një mundësi të artë për bardheblutë për të treguar një reagim dhe për të rivendosur besimin te skuadra dhe tifozët. Në portë do të qëndrojë Tafas, i cili do të ketë detyrën të ruajë rrjetën dhe të jetë i sigurt pas çdo kërcënimi të kundërshtarit. Mbrojtja katërshen përbëhet nga Vera, Dembele, Marku dhe Ismajli, ku secili ka një rol të qartë.

Të ofrojë mbulim të fortë dhe të ndihmojë në ndërtimin e sulmeve nga prapavija. Kjo linjë mbrojtëse duhet të jetë e bashkuar dhe e kujdesshme, sidomos ndaj kundërsulmeve të shpejta të Flamurtarit. Në mesfushë, Rafael, Meta dhe Soler do të kenë përgjegjësi të ndryshme. Rafael do të përqendrohet më shumë te organizimi i lojës dhe ndërtimi i aksioneve, ndërsa Meta dhe Soler duhet të sjellin kreativitet, të lidhin mesfushën me sulmin dhe të ofrojnë asistet e duhura për sulmuesit. Kjo repart duhet të jetë zemra e skuadrës, duke kontrolluar ritmin e ndeshjes dhe duke ofruar mbulim të shpejtë kur Flamurtari sulmon. Në sulm, Tabeku, Falaje dhe Haxhiu do të kërkojnë të gjejnë hapësira dhe të shfrytëzojnë çdo mundësi për gol. Tabeku dhe Haxhiu pritet të mbulojnë krahët dhe të krijojnë mundësi nga skajet e fushës, ndërsa Falaje ka rolin e sulmuesit qendror, i cili duhet të jetë pika e referimit për kombinimet e bardhebluve.

STATISTIKAT

Nga statistikat që shtrihen nga sezoni 2007 deri në vitin 2025, dallohet një tablo e qartë dominuese e bardhebluve, por edhe me periudha të forta të vlonjatëve. Një nga elementët që bie menjëherë në sy është fakti se Tirana ka dominuar shumicën e ndeshjeve në fushën e saj. Rezultatet e tipit 1–0, 2–0, 3–0 dhe fitoret e shpeshta në kryeqytet tregojnë qartësisht se bardheblutë historikisht kanë ditur të ruajnë autoritetin ndaj Flamurtarit në shtëpi. Dueli i vitit 2025, i përfunduar 1–1, ishte një përjashtim që ndërpreu një seri të gjatë triumfesh të Tiranës në kryeqytet.

PANORAMASPORT.AL

---