Tirana pritet të zbresë në fushë me një formacion të orientuar drejt lojës sulmuese për sfidën me Flamurtarin. Stafi teknik po projekton një rreshtim 4-3-3, me synimin për të ruajtur ekuilibrin mes fazës mbrojtëse dhe asaj ofensive, duke shfrytëzuar shpejtësinë në krahë dhe lëvizshmërinë në vijën e parë.

Në portë pritet të konfirmohet Tafas. Para tij, mbrojtja parashikohet të përbëhet nga Vera në krahun e djathtë, Kresiç dhe Kortez në qendër, si dhe Ndong në krahun e majtë. Mesfusha do të ketë rol kyç në ndërtimin e lojës.

Myslovic, Marku dhe Alvarez janë tre emrat që pritet të formojnë bërthamën e mesit të fushës, duke kombinuar agresivitetin në rikuperim me cilësinë në pasim. Nga këmbët e tyre pritet të nisë shumica e aksioneve sulmuese të bardhebluve.

Në repartin ofensiv, Tabeku dhe Xhixha do të veprojnë në krahë, duke ofruar shpejtësi dhe depërtim, ndërsa Ernest pritet të jetë pika referente në majën e sulmit.

PANORAMASPORT.AL

---