Skandali, bari dhe mbeturinat pushtojnë stadiumin e Librazhdit
Mure të shkatërruara, bari që ka pushtuar ato pak shkallë që kanë mbetur, kanalizime ku epidemitë mund të përhapen shumë lehtë dhe një fushë jashtë çdo lloj standardi. Stadiumi i Librazhdit mund të konsiderohet i “vdekur”.
Situata është alarmante, në një kohë që nuk duket se ka shpresë për ndërhyrje, të paktën në një periudhë afatshkurtër. Ish-kryebashkiaku i Librazhdit, Shefki Çota dhe ai aktuali, Kastriot Gurra apo edhe deputeti i zonës, Taulant Balla, kanë premtuar qindra herë për një impiant modern në Librazhd. Madje, projekti që qarkullon është mahnitës dhe të le pa fjalë. Por, e vërteta është se nuk është bërë asgjë në këtë drejtim dhe Sopoti vazhdon t’i luajë ndeshjet jashtë fushës së vet.
Rrënimi
Që prej ndërtimit të këtij stadiumi në vitet 50-të, nuk është bërë asnjë ndërhyrje. Përveç sistemimeve dhe pastrimeve të herëpashershme, nuk ka ndodhur asnjë ndërhyrje tjetër. Por, vitet e fundit, gjithçka ka degraduar në ekstrem. Prej dy sezonesh, skuadra nuk luan më në këtë stadium, pasi ai nuk plotëson asnjë kriter dhe në këtë mënyrë është lënë krejtësisht pas dore.
Në pamjet aktuale që ka arritur të sigurojë gazeta “Panorama Sport”, shihet qartë se në çfarë grade ndodhet aktualisht stadiumi. Ato pak shkallë që kanë mbetur nuk duken më thuajse fare, pasi janë të mbuluara nga bari. Dhomat e zhveshjes janë shndërruar në “banje publike”, ku shkatërrimi duket qartë. Një pjesë është e mbushur me një grumbull mbeturinash të palëvizshme prej shumë muajsh.
Gjithashtu, për fushën thuajse nuk kujdeset më njeri dhe një pjesë e mirë e saj është krejtësisht e papërdorshme për shkak se bari është rritur shumë dhe është e pamundur të luash normalisht. Tifozët kanë ngritur shumë herë zërin, por heshtja e drejtuesve vendor vazhdon.
Projekti si duhej te ishte stadiumi i Librazhdit
Ndërkaq, prej më shumë se tri vitesh, qarkullon në letër dhe në internet projekti për ndërtimin e stadiumit të ri të Librazhdit. Por, tifozët dhe lojtarët duhet të kënaqen vetëm me faktin që e shohin në letër. Kostoja e lartë duket se është problemi kryesor. Por, gjithsesi, premtimet janë të përhershme dhe nuk rreshtin në asnjë moment.
Ledion Qoshku
