Në prag të një prej ndeshjeve më të rëndësishme të sezonit, Skënderbeu ka një hall jo fort të vogël për të zgjidhur. Mesfushori portugez Paolo Estrela ka plotësuar numrin e kartonëve të lejuar dhe për pasojë është i skualifikuar për ndeshjen e radhës.

Një goditje e madhe për korçarët, që kanë gjetur tek Estrela një mesfushor cilësor që ka dhënë një tjetër marsh sa i përket organizimit të lojës së korçarëve. Kjo mungesë duket se ka vënë në dilemë jo fort të vogël pankinën korçare, që është duke menduar dhe provuar zgjidhjet e mundshme për të plotësuar mungesën e regjisorit portugez.

Të pakën nga provat e bëra deri tani nga ana e trajnerit Ernest Gjoka, duket se Skënderbeu po kërkon zgjidhjen më të mirë të mundshme, duke mos humbur asgjë, qoftë në ndërtimin e aksioneve, ashtu edhe në fazën defensive. Në kushte të tilla pritet që Juri të jetë në fushë nga minuta e parë duke u bashkuar në mesin e fushës me Sibon.

Ndërsa dilema e vetme mbetet nëse do të jetë braziliani Lukinas apo afrikani Frenklin lojtari i tretë që do të kompletojë këtë repart. Me Lukinas, Skënderbeu fiton shumë në organizim, por Gjoka nuk është i bindur nëse do të jetë po aq i balancuar edhe në fazën defensive. Ndaj pritet që seanca e sotme të testojë edhe një herë balancat e ekipit për të dalë me një vendim për sa i përket formacionit të së shtunës.

ATMOSFERA – Prej dy ditësh korçarët janë zhvendosur në Durrës për të vijuar përgatitjet e ndeshjes në transfertë ndaj Egnatias. Një zgjedhje kjo e vetë klubit bardhëkuq, që ka kërkuar më shumë qetësi dhe përqendrim nga ekipi, në prag të një takimi shumë të rëndësishëm për pjesën e fundit të sezonit. Kjo zgjedhje është lidhur edhe me praninë e presidentit Ardjan Takaj, që çdo ditë ka qenë afër ekipit duke dhënë mbështetjen morale për të kaluar me sukses ndeshjen e ardhshme.

Takaj, veç takimeve të vazhdueshme me stafin teknik, ka pasur edhe takime me pjesën tjetër të ekipit duke u munduar të përçojë tek skuadra sinjalet pozitive. Takaj gjatë takimit me ekipin ka përcjellë qetësinë dhe përqendrimin te ndeshja e radhës, duke iu drejtuar ekipit me një fjalim të thjeshtë dhe motivues për të rritur përgjegjësinë në skuadër.

I bindur te forca e grupit, presidenti i korçarëve, veç mbështetjes së tij, u ka kërkuar lojtarëve që të bëjnë më të mirën e mundshme në dy javët e fundit për të arritur qëndrimin pa asnjë siklet në Superiore, një sforco që korçarët duhet ta bëjnë qysh në ndeshjen e së shtunës përballë kampionëve në fuqi.

LLAZI SARO – PANORAMASPORT.AL

---