Barazimi ndaj Sëlltikut në miqësoren e parë të verës, përveç spektaklit, solli edhe disa pika reflektimi mbi idenë e futbollit që Ruben Amorim dëshiron të sjellë te Milani i ri.

Nuk do të ketë më një skuadër që qëndron e tërhequr në mbrojtje, por synohet rikuperimi i topit në gjysmën e fushës së kundërshtarit, sulmi i shpejtë i hapësirave dhe një filozofi më vertikale krahasuar me menaxhimin e mëparshëm të Masimiliano Alegrit. Për këtë arsye duhen lojtarë me karakteristika të përshtatshme, si në aspektin teknik ashtu edhe në atë fizik, sidomos në zonat anësore të fushës.

JO PËR SHITJEN E ÇUKUEZES Gjatë pranverës së kaluar ishte një moment kur drejtuesit e Fulhamit kishin shfaqur interes për ta blerë përfundimisht Samuel Çukuezen, ndërsa Milani shpresonte të arkëtonte 24 milionë euro nga transferimi i tij. Dështimi i marrëveshjes dukej se mund të kthehej në një problem për kuqezinjtë, por situata ndryshoi me ardhjen e Amorimit në stol. Trajneri portugez, që nga dita e parë, vendosi të besojë te lojtari nigerian dhe të provojë ta rikthejë në një rol të ri. Ndryshe nga rasti i Musahut, për të cilin klubi kishte një qasje tjetër, Amorim është bindur nga cilësitë e Çukuezes dhe po punon për ta transformuar atë nga një anësor ofensiv në një lojtar krahu të një mesfushe me katër futbollistë. Bëhet fjalë për ta spostuar disa metra më poshtë në fushë, por me detyra të ndryshme. Të krijojë raste për sulmuesit, duke ndihmuar njëkohësisht edhe në fazën mbrojtëse. Përshtypjet e para janë pozitive dhe për këtë arsye çdo ofertë në merkato është refuzuar, veçanërisht ajo e Trabzonsporit. Çukueze, përveç rastit kur vjen një ofertë e jashtëzakonshme, do të mbetet pjesë e Milanit.

BLLOKIMET Në njërën anë të fushës, Amorim kërkon një lojtar me aftësi të forta në duelet një kundër një, si Çukueze ose Salemakers. Në anën tjetër, trajneri portugez kërkon më shumë ekuilibër, në mënyrë që skuadra të mos kapet e papërgatitur gjatë tranzicioneve mbrojtëse. Bartezagi është një alternativë e njohur dhe me Amorim pritet të ketë shumë minuta edhe si mbrojtës i majtë në një mbrojtje me tre lojtarë. Por risia më e madhe është Pervis Estupinan. Trajneri i ri i Milanit ka bllokuar negociatat me Aston Vilën, të cilat ishin të avancuara por ende nuk ishin mbyllur përfundimisht, sepse dëshiron ta testojë vetë mbrojtësin ekuadorian. Amorim beson se forma e fundit e Estupinanit në fanellën kuqezi nuk ka treguar vlerën e vërtetë të lojtarit dhe se ai mund të rikthehet në nivelet më të mira.

IDEJA GUERREIRO Një tjetër emër i pëlqyer nga Amorim është Nousair Mazraui i Mançester Junajtid, por ekzistojnë disa pengesa. Lojtari nuk luan më prej vitesh si anësor i mesfushës dhe klubi anglez deri tani nuk ka dhënë sinjale për një largim të tij. Një ide më intriguese lidhet me Rafael Guerreiron. Futbollisti portugez, i lindur në vitin 1993, është i lirë pas përfundimit të aventurës së tij me Bajernin e Mynihut. Edhe pse nuk është më në moshë të re, ai ka një eksperiencë të madhe dhe një CV të nivelit të lartë. Në Bundesligë, me fanellat e Borusia Dortmundit dhe Bajern Mynihut, Guerreiro ka regjistruar 42 gola dhe 47 asistime në 223 paraqitje. Milani po vlerëson mundësinë e afrimit të tij pa kosto transferimi, ndërsa Amorim kërkon lojtarë që mund t’i përshtaten menjëherë filozofisë së tij të lojës.

PANORAMASPORT.AL

---