Legjenda e Gjermanisë, Nojer lë ende një derë hapur: Ky është turneu im i fundit
Manuel Nojer u rikthye në ko mbëtaren gjermane vetëm pak para Kupës së Botës për të marrë sërish vendin e titullarit në portë. Pas turneut në SHBA, Meksikë dhe Kanada, kapiteni i Bajernit ka shumë gjasa ta lërë përfundimisht vendin e tij në ekipin kombëtar. Megjithatë, ai ende nuk e ka konfirmuar plotësisht këtë vendim. Manuel Nojer planifikon të tërhiqet nga kombëtarja gjermane pas Kupës së Botës.
“Për mua është pothuajse e vendosur që ky do të jetë turneu im i fundit. Nuk e shoh veten duke qenë sërish në portë në një Kampionat Evropian pas dy vitesh,” deklaroi 40 vjeçari në një konferencë për shtyp të enjten.
Megjithatë, Nojer la një derë të vogël të hapur për periudhën pas Kupës së Botës. “Ditët e fundit ishte hera e parë që mendova se këto mund të jenë ndeshjet e mia të fundit me Gjermaninë. Por as gjatë Kampionatit Evropian nuk e kisha këtë në mendje. Për këtë arsye nuk bëra asnjë deklaratë të tillë menjëherë pas eliminimit kundër Spanjës. Nuk dua të merrem më me këtë temë tani, sepse jam i përqendruar te ajo që kam përpara.”
Njëkohësisht, fituesi i Kupës së Botës pranoi se ishte tërhequr më parë “për arsye të forta”. Dy vitet pas Kampionatit Evropian kishin qenë “tepër të lodhshme” me fanellën e kombëtares gjermane. Nojer kishte vuajtur deri vonë nga probleme në pulpën e këmbës dhe për këtë arsye mungoi edhe në përgatitjet e menjëhershme për Kupën e Botës. Portieri e përshkroi rikthimin e tij në kombëtare si një “dhuratë”. Ai tha se nuk mund të përcaktonte një moment të vetëm që solli ndryshimin e situatës: “Gjithçka erdhi natyrshëm. Ka të bëjë edhe me paraqitjet e mia në nivelin më të lartë të futbollit të klubeve pas rikthimit nga dëmtimi.”
Nojer kishte treguar paraqitje të klasit botëror. Si rezultat, portieri i Bajernit arriti të rikthehej si zgjedhja e parë, duke lënë në stol Oliver Bauman. Portieri i Hofenhajm kishte fituar më parë garën me Aleksander Nubel pas dëmtimit afatgjatë të Ter Shtegen. Nojer e përshkroi marrëdhënien e tij me Bauman si “shumë të mirë”. Nojer shpjegoi: “Biseduam gjatë në Herzogenaurash dhe diskutuam edhe zhvillimin e ekipit. Patëm një bisedë të hapur dhe të sinqertë. Oli bëri një punë të jashtëzakonshme. Ne e dimë se kemi katër portierë shumë të mirë.”
KLAJDI BAJO-PANORAMASPORT.AL
