Laçi mund Dinamon në KAS Lozanë, duke i fituar 40 mijë euro për periudhën e formimit, si dhe kostot gjyqësore e të avokatisë, shifër kjo që kalon 40 mijë euro të tjera.

Dy klubet shqiptare, në mënyrë të fshehtë, prej vitit 2023 kanë nisur një luftë nëpër gjykatat sportive të FIFA-s, që ka përfunduar më pas në KAS Lozanë, ndërsa në fund kanë qenë kurbinasit ata që ia kanë dalë të triumfojnë në mars.

Objekti i sherrit ka qenë lojtari Albion Marku dhe pagesa për periudhën e formimit të tij, të cilën e pretendonte Laçi, në momentin që futbollisti ka firmosur me Dinamon.

PROCEDURA PARA FIFA-S

Më 2 shkurt 2023, KF Laçi parashtroi një kërkesë para FIFA DRC, duke kërkuar pagesën e kompensimit të stërvitjes (periudha e formimit) në bazë të regjistrimit të lojtarit si profesionist me Dinamon. Laçi kërkoi 41,095.89 EUR plus 5% interes në vit në datat e pagesës. Më 7 shkurt 2023, Sekretariati i Përgjithshëm i FIFAs iu drejtua Palëve me një propozim për zgjidhje, duke sugjeruar që Dinamo t’i paguajë Laçit shumën prej 39,780,82 euro, si kompensim trajnimi plus 5% interes në vit nga data 30 shtator 2022 deri në datën e pagesës efektive.

Më 27 shkurt 2023, Dinamo hodhi poshtë propozimin, duke argumentuar se ai ishte një klub i kategorisë IV deri në momentin që regjistroi lojtarin dhe për këtë arsye nuk duhej të paguante kompensim për periudhën e formimit. Dhoma e Zgjidhjes së Mosmarrëveshjeve të FIFA-s(FIFA DRC), pas refuzimit të Dinamos i dha të drejtë Laçit. Pala përgjegjëse, Dinamo City, duhet t’i paguante paditësit shumën prej 39,780.82 euro, si kompensim trajnimi plus 5% interes në vit nga data 30 shtator 2022 deri në datën e pagesës efektive. Kësaj shume i shtohen edhe 3000 euro shpenzime gjyqësore.

ANKESA NË KAS

Pas njoftimit të arsyetuar, më 16 maj 2024, Dinamo paraqiti apel në Gjykatën e Arbitrazhit Sportiv(“KAS”) kundër vendimit të FIFA-s. Në thelb, pretendimet ishin si më poshtë: “Dinamo ishte një klub i Kategorisë IV të UEFA-s në kohën kur lojtari u transferua tek ai dhe për këtë arsye nuk kërkohet kompensim trajnimi. Në përputhje me qarkoren e FIFA-s nr. 1805, Rregulloret për Statusin dhe Transferimin e Lojtarëve, FSHF-ja duhet të kategorizojë klubet e saj në kategorinë III ose në kategorinë IV të UEFA-s.

Ankuesi argumentoi se me kohën që lojtari ishte regjistruar me të, pra më 30 gusht 2022, që ishte gjatë sezonit futbollistik 2022/23, ai mori pjesë në Kategorinë e Parë, niveli i dytë në futbollin shqiptar. Dinamo kishte zbritur nga Kategoria Superiore, në Kategorinë e Parë të nivelit të futbollit shqiptar, në fund të sezonit futbollistik 2021/22.

Ndaj, për sezonin futbollistik 2022/23 duhet të ishte vendosur në Kategorinë IV nga FSHF-ja, ku më pas të përjashtohej nga pagesa e kompensimit të stërvitjes. Sipas ankuesit, FSHF-ja ka kategorizuar vazhdimisht klubet e saj të lidhura në Kategoria Superiore në Kategorinë III, dhe klubet e saj të lidhura në Kategorinë e Parë në Kategorinë IV. Në sezonin futbollistik 2022/ 23, FSHF-ja kategorizoi 12 nga 14 klubet e Kategorisë e Parë në Kategorinë IV. Dy klubet, KF Skënderbeu dhe Dinamo, u kategorizuan në Kategorinë III”.

FAJI I FSHF-SË

Ankuesi parashtroi se, megjithëse FSHF-ja, në përputhje me qarkoren e FIFA-s, duhet të kishte përditësuar kategorizimin e klubeve të saj të lidhura për sezonin futbollistik 2022/23 deri më 31 korrik 2022, dhe me atë e përditësoi faktikisht ndryshimi u bë vetëm në janar. FSHF e kishte njohur gabimin e saj dhe pas transferimit përkatës të lojtarit. Kështu, në momentin e transferimit, Ankuesi ishte kategorizuar gabimisht në TMS të FIFA-s si një klub i Kategorisë III. Ankuesi deklaroi se nuk mund të mbajë përgjegjësi për gabimin e bërë nga FSHF-ja për kategorizimin e gabuar.

VENDIMI I KAS

Si pikënisje, arbitri i vetëm i KAS-it vërejti se FSHF-ja e kategorizoi Dinamon në kategorinë III të UEFA-s. Për më tepër, pasaporta e lojtarit e lëshuar nga FSHF-ja më 19 janar 2023 e tregonte Dinamon si një klub të kategorisë III të UEFA-s. Arbitri i vetëm vërejti më tej se pothuajse gjashtë muaj pas transferimit përkatës, më 22 shkurt 2023, FSHF iu drejtua Dinamos me një letër ku deklaronte se ankuesi(Dinamo) i përkiste kategorisë IV të UEFA-s për shkak të pjesëmarrjes së saj në Kategorinë e Parë.

Arbitri i vetëm konstatoi se letra e FSHF-së mund të kuptohet si një pranim nga vetë shoqata se ajo ka bërë një gabim kur e kategorizoi Dinamon si klub i kategorisë III. Nga ana tjetër, një shoqatë duhet të marrë në konsideratë kriteret e ndryshme të një klubi të bazuar, tek ato financiare dhe jo vetëm dhe të mos mbështetet automatikisht në kategorinë në të cilin klubi merr pjesë. Arbitri i vetëm nuk ka gjetur të vërtetuar se pala përgjegjëse (Laçi) ka përfituar nga ajo që vetë FSHF-ja e pranon si një gabim ose nuk e ka gjetur të provuar se pala përgjegjëse(Laçi) ka vepruar me keqbesim.

GABIMI I DINAMOS

Së fundi, arbitri i vetëm vërejti se në kohën e transferimit përkatës, Dinamo kishte akses në kategorinë e tij të caktuar në FIFA TMS, pasi kategoria e tij shfaqet në sistem. Kështu, siç argumentohet nga pala përgjegjëse (Laçi), për të përfunduar një transferim, ankuesi shikon vazhdimisht kategorinë që i është atribuar.

Nëse ankuesi (Dinamo) nuk ishte dakord me një kategori të tillë, ai mund të informonte FSHF-në dhe t’i kërkonte që të rregullonte kategorinë e saj nëse FSHF-ja pranonte që ankuesi ishte kategorizuar gabimisht, përpara se ankuesi të vendoste të përfundonte procesin e transferimit. Edhe pse është përgjegjësia e vetme e shoqatave (FSHFsë) që të kategorizojnë klubet e saj të lidhura dhe skuadrat duhet të kenë një mbështetje legjitime në një kategorizim të tillë, kjo nuk i pengon ato(klubet) që t’i bëjnë të vetëdijshme shoqatat për ndonjë gabim që mund të ketë ndodhur.

Pikërisht në këtë kontekst, ankuesi (Dinamo) duhej të bënte kujdesin e duhur dhe duke qenë se ishte klubi që ishte i interesuar për regjistrimin e lojtarit, ishte pala që me të drejtë duhet të mbante rrezikun që informacioni mbi bazën e të cilit u krye procesi i transferimit mund të mos ishte i saktë dhe adekuat. Në fund, në 5 mars 2024, KAS Lozanë hodhi poshtë ankimin e Dinamos dhe i dha të drejtë Laçit. Dinamo duhet t’i paguajë 39,780.82 euro, plus 5% interes, nga 30 shtator 2022 ekipit të Laçit.

OLSI AVDIAJ-PANORAMASPORT.AL

---