Nga futbolli në boks, Uejn Runi drejt ringut/ Ish-sulmuesi po negocion nisjen e një karriere të re
Uejn Runi është në bisedime për një ndeshje të bujshme boksi dhe deri tani ka shumë kundërshtarë të mundshëm për debutimin e ikonës së futbollit në këtë sport. Legjenda e Mançester Junajtidit ka zhvilluar bisedime paraprake me kompaninë e promovimit të boksit “Misfits” dhe shumë shpejt mund të kemi debutimin e golashënuesit më të mirë të “djajve të kuq” në ring.
Sipas “Mirror”, marrëveshja që ishsulmuesi të dalë në ring ende nuk është arritur, pavarësisht se bisedimet kanë filluar disa javë më parë. Runi, ka qenë pjesë e një klubi amator boksi kur ishte fëmijë, por më pas ndoqi një tjetër ëndërr, atë të futbollit ku nisi gjithçka për ngjyrat e Evertonit. Promotori i boksit, Edi Hërn, beson se 38-vjeçari mund të ketë një karrierë të jashtëzakonshme, të paktën me ndeshje “miqësore”, në sportin burrëror.
“The Sun” ka nxjerrë një listë me 7 kandidatë të mundshëm për Runin në boks. Kështu, një kundërshtar i mundshëm do të ishte një personazh i njohur në “You Tube”, i kthyer në boksier, Xhejk Pol. Hërn zbuloi gjithashtu se Runi i kishte kërkuar atij një ndeshje më parë, por se ai e bënte një kërkesë të tillë gjithnjë kur ishte i dehur dhe për këtë arsye ai nuk i kushtonte shumë rëndësi.
Megjithatë, këtë herë duket se historia është ndryshe dhe mund të kemi një duel mes tij dhe Pol. Një ndeshje e mundshme mund të zhvillohet në stadiumin legjendar “Old Trafford”, e cila ishte shtëpia e Uejn Runi gjatë karrierës së tij të lavdishme me Mançester Junajtid.
Përgatiti: ANDROKLI DRALO – PANORAMASPORT.AL
NDIQE LIVE "PANORAMA TV"