Etapa e 13-të e Turit të Francës 2026 dhuroi emocione të shumta dhe një betejë të fortë mes çiklistëve të shkëputur. Gara 205 kilometra nga Dole drejt Belfortit u karakterizua nga ritme shumë të larta dhe sulme të shumta që në fillim.Mbi 50 çiklistë arritën të krijonin shkëputjen kryesore, duke përfituar nga fakti se kjo etapë shihej si një mundësi ideale për fituesit e ditës. Pas seleksionimit në ngjitjen e vështirë të Ballon d’Alsace, grupi i madh filloi të ndahej dhe mbetën vetëm kandidatët kryesorë për fitoren. Në fund, triumfi shkoi për Mauro Schmid. Çiklisti i skuadrës Jayco AlUla tregoi forcë dhe qetësi në momentin vendimtar, duke mposhtur në sprintin final kolumbianin Harold Tejada.

Ky ishte një sukses shumë i rëndësishëm për çiklistin zviceran dhe ekipin e tij. Vendin e tretë e mori Tom Pidcock, i cili ishte protagonisti i madh i ditës. Britaniku realizoi një sulm të zgjuar në kilometrat e fundit dhe përfitoi nga diferenca e krijuar ndaj grupit të favoritëve. Falë kësaj lëvizjeje, Pidcock u ngjit në vendin e katërt të klasifikimit të përgjithshëm, vetëm 9 sekonda pas Remco Evenepoel. Një përfitim i madh për britanikun, që tashmë futet në luftën për pozitat e larta. Ndërkohë, grupi i fanellës së verdhë mbërriti në finish me një vonesë prej 7 minutash e 33 sekondash. Favoritët për fitoren finale nuk humbën shumë terren, por etapa tregoi se gara mbetet e hapur.

Tadej Pogacar mbron fanellën e verdhë dhe avantazhin 3 minuta e 36 sekonda ndaj Jonas Vingegaard. Ritmi i garës ishte jashtëzakonisht i lartë, me një shpejtësi mesatare mbi 50 kilometra në orë. Sulmet nisën që nga kilometri i parë, ndërsa skuadrat luftuan fort për të futur përfaqësuesit e tyre në shkëputjen fituese. Pas shumë përpjekjesh, u krijua një grup prej 57 çiklistësh që morën avantazhin. Ngjitja në Ballon d’Alsace ishte pika ku filloi seleksionimi i vërtetë dhe ku u përcaktuan pretendentët për fitoren.

Schmid dhe Tejada ishin më të fortët në fund të etapës dhe dueluan deri në vijën e finishit në Belfort. Zvicerani ishte ai që pati më shumë fuqi në sprint dhe siguroi fitoren. Etapa e 13-të e Turit të Francës konfirmoi edhe një herë spektaklin e kësaj gare, ndërsa sfidat malore të ditëve në vijim pritet të sjellin ndryshime të tjera në renditjen e përgjithshme.

ARTIN LLESHAJ-PANORAMASPORT.AL

---