Atletja etiopiane Gudaf Tsegay, një nga emrat më të njohur të atletikës botërore, është pezulluar për katër muaj për shkelje të rregullave antidoping.

Dy herë kampionia e botës dhe medalistja olimpike pranoi praninë e një substance të ndaluar në një test të kryer jashtë garave. Tsegay rezultoi pozitive për një metabolit të letrozolit, substancë e ndaluar nga Agjencia Botërore Antidoping (WADA).

Atletja shpjegoi se ilaçi i ishte përshkruar nga mjekët për trajtimin e një problemi shëndetësor dhe paraqiti dokumentacionin përkatës. Në shkurt, ajo kërkoi një Përjashtim për Përdorim Terapeutik (TUE), ndërsa “World Athletics” konfirmoi se trajtimi i saj përmbushte kriteret e kërkuara.

Megjithatë, WADA refuzoi dhënien e një përjashtimi retroaktiv, duke çuar në një marrëveshje mes sportistes, WADA-s dhe Njësisë së Integritetit të Atletikës (AIU). Sipas AIU, pezullimi 4-mujor u konsiderua i përshtatshëm, pasi u vlerësua se sportistja nuk kishte përgjegjësi apo neglizhencë të konsiderueshme. Tsegay është fituese e medaljes së bronztë olimpike në 5.000 metra dhe kampione bote në disiplinat 5.000 dhe 10.000 metra.

PANORAMASPORT.AL

---