Dinamo dhe Vora zhvilluan pasditen e djeshme sfidën e javës së 18 të Superiores, aty ku veç 3 golave të shënuar, kishte edhe shumë momente interesante. Gola të anuluar, tifozë të paktë apo edhe festa në ambientet e stadiumit, ishin padyshim disa nga momentet më interesante nga sfida e zhvilluar në “Air Albania”.– Ashtu siç edhe pritej, në stadiumin “Air Albania” kishte pak tifozë, ku në tribunën përballë dhe pas porte, mund të numëroheshin lehtësisht se sa të pranishëm ishin si në kohën e COVID, kur ndeshjet zhvilloheshin pa tifozë.

– Mungesa e tifozëve në tribuna, bënte shpesh herë që të dëgjoheshin lojtarët duke folur me njëri-tjetrin apo edhe arbitrat.

– Në një nga lokalet e stadiumit, ishte një festë e fundvitit dhe muzika e lartë në lokal, shpesh herë tërhiqte vëmendjen e të pranishmëve në tribunën qendrore dhe atë VIP.

– Në tribunat e “Air Albania” kishte disa figura sportive dhe lojtarë të të dyja skuadrave që nuk po luanin. Qefalija e Aliji nga Dinamo si edhe Hasaj e Kasalla nga Vora po ndiqnin ndeshjen në stadium.

– Sfida gjykohej nga kryesorja Emanuela Rusta dhe ndihmohej nga asistentja Edjena Kapxhiu ndërkohë që dy arbitrat tjerë ishin meshkuj.

– Megjithëse jemi pranë fundit të dhjetorit, temperaturat për të luajtur ishin ideale për një ndeshje futbolli.

– Qardaku shënoi golin e tretë me skuadrën e Dinamos dhe në shenjë respketi, vendosi të mos festonte për shkak se ka luajtur me Vorën para Dinamos. Megjithatë, sistemi VAR e anuloi golin e tij.

– Pavarësisht se përballë kishte pak tifozë të Dinamos, shpesh herë mundoheshin të bënëin atmosferë me tupan dhe me brohoritje.

– Sfida ishte relativisht e qetë në fushë pa tension mes lojtarëve apo edhe stafeve, të cilët në fund i dhanë dorën njëri-tjetrit.

– Sistemi VAR hyri 3 herë në punë, ku fillimisht anuloi golin e Vorës e më pas i dha një penallti Vorës. Në të dytën, anuloi gol për Dinamon.

PANORAMASPORT.AL

---