Në Kampionatin Botëror të peshëngritjes për U-17 dhe U20 në Lima të Perusë, për Shqipërinë konkurruan edhe Ertjan Kofsha me Antonino Mullisin.Dy talente shumë premtuese të shtangës kuqezi, të cilët ndonëse nuk arritën që të futeshin në zonën e medaljeve, bënë paraqitje mjaft të mira, duke afruar me podiumin. Kështu Ertjan Kofsha garoi në orët e para të mëngjesit të së dielës në kategorinë e peshave 96 kg për moshat U-20.

Shtangisti shtërmenas regjistroi 161 kg në stilin e shkëputjes, duke u klasifikuar në vendin e katërt. Në shtytje Kofsha ngriti 197 kg, duke marrë një tjetër vend të katërt. Ndërsa me 358 kg gjithsej, 20- vjeçari kuqezi e përfundoi dygarëshin në vendin e pestë. Formë mjaft të mirë tregoi edhe Antonino Mullisi në garat për moshat U-17.

Peshëngritësi 16-vjeçar i Vllaznisë u rendit në vendin e katërt në stilin e shkëputjes, duke regjistruar rezultatin 125 kg. Në shtytje e mbylli me 151 kg për të marrë vendin e pestë, ndërsa me 276 kg gjithsej u klasifikua i pesti edhe në dygarësh në Kampionatin Botëror.

PANORAMASPORT.AL

---