Komiteti organizator i Lojërave Olimpike “Los Angeles 2028” ka njoftuar hapjen e fazës së dytë të shitjes së biletave për të gjitha sportet olimpike. Procesi do të nisë me një para-shitje ekskluzive për mbajtësit e kartave Visa nga 29 deri më 31 korrik, ndërsa shitja e përgjithshme do të zhvillohet nga 10 deri më 20 gusht.Regjistrimet për lotarinë mbyllen më 22 korrik. Biletat do të shpërndahen përmes një sistemi lotarie dhe orareve të caktuara të blerjes, si në fazën e parë. Sipas “LA28”, do të ketë bileta për të gjitha sportet dhe në kategori të ndryshme çmimesh, që nisin nga 28 dollarë. Faza e parë e shitjes rezultoi shumë e suksesshme, me 4 milionë bileta të shitura në 85 vende, një rekord për Lojërat Olimpike.

Megjithatë, organizatorët u përballën me kritika për çmimet e larta, tarifat shtesë dhe disponueshmërinë e kufizuar të biletave për eventet më të kërkuara. Organizatorët deklarojnë se kërkesa ka tejkaluar ndjeshëm pritshmëritë, duke theksuar interesin e madh të publikut për rikthimin e Olimpiadës në Los Anxhelos pas 40 vitesh.

Shitja e biletave dhe paketat e mikpritjes përbëjnë dy nga shtyllat kryesore financiare të “LA28”. Organizatorët presin të gjenerojnë rreth 2.5 miliardë dollarë nga këto burime, duke kontribuar në një buxhet operacional të vlerësuar në 7.1 miliardë dollarë. Gjithashtu, projektohen edhe 2.5 miliardë dollarë të tjera nga sponsorizimet, ndërsa deri tani janë siguruar 2 miliardë dollarë përmes partneriteteve vendase.

PANORAMASPORT.AL

---