Kombëtarja gjermane e ka siguruar tashmë vendin e parë në grup pas vetëm dy ndeshjeve. Kjo është një arritje e rëndësishme, por sjell edhe një rrezik të konsiderueshëm, veçanërisht pasi skuadra ende përballet me një disavantazh të madh. Të enjten, Gjermania përballet me Ekuadorin në Nju Jork (ora 22:00 me orën e Evropës Qendrore). Në letër, rezultati duket i parëndësishëm, pasi ekipi është tashmë i kualifikuar si fitues i grupit.

Megjithatë, realiteti është krejt ndryshe. “Fitorja është gjithmonë receta më e mirë. Për të qenë i sinqertë, ne nuk jemi këtu për pushime,” deklaroi Julian Nagelsman në Toronto, duke u përpjekur të shmang çdo rënie të përqendrimit te lojtarët e tij.

“Po përpiqemi të fokusohemi te rruga jonë. Duam të korrigjojmë disa detaje të vogla. Dhe nëse përgatitesh seriozisht për ndeshjen e ardhshme, atëherë je i përgatitur edhe për sfidat me eliminim direkt,” shpjegoi trajneri gjerman strategjinë e tij. Kjo është edhe më e rëndësishme për shkak të formatit të ri të turneut, i cili e bën shumë të vështirë analizimin e kundërshtarëve të ardhshëm.

Edhe pse Gjermania e di tashmë pozicionin e saj në grup, ajo ende ka disa kundërshtarë të mundshëm për fazën e 1/32. “Ne duam ta fitojmë ndeshjen kundër Ekuadorit. Më pas do të shohim se kush do të jetë kundërshtari ynë i ardhshëm dhe do të përgatitemi për të,” tha Nagelsman, duke e ditur se rivali i radhës me shumë gjasa do të përcaktohet vetëm të shtunën në mbrëmje, dy ditë para ndeshjes.

Aktualisht ekzistojnë ende 15 kundërshtarë të mundshëm për kombëtaren gjermane. Skocia, Paraguai dhe Australia konsiderohen alternativat më të mundshme. Megjithatë, për momentin e gjithë vëmendja është te Ekuadori. “Duhet të vazhdojmë ritmin tonë, çdo fitore na ndihmon,” tha Nadiem Amiri, i cili shkëlqeu si zëvendësues dhe dhuroi një asist në ndeshjen kundër Bregut të Fildishtë. Mesfushori i Mainzit nuk pret një rotacion të madh në formacion: “Nuk besoj se Juliani do të bëj shumë eksperimente,” u shpreh ai.

PANORAMASPORT.AL

---