Kategoria e Parë hyn në fazën më vendimtare të sezonit, aty ku çdo pikë peshon sa një sezon i tërë. Me vetëm dy javë nga fundi i sezonit të rregullt, skenari është pjesërisht i qartë, por ende i mbushur me tension dhe dilema. Skënderbeu dhe Laçi kanë siguruar tashmë rikthimin në elitë, por beteja për titullin kampion mbetet e hapur dhe pritet të vendoset në këto 180 minuta finale. Në krahun tjetër, Pogradeci është i “betonuar” në vendin e tretë dhe e ka të sigurt fazën “play-off”, ndërsa lufta për vendet e tjera të kësaj faze është plotësisht e hapur.

Nga Besa e vendit të pestë deri te Burreli i vendit të tetë, gjithçka mund të ndryshojë. Ndërkohë, fundi i tabelës është një “ferr” i vërtetë sportiv. Katër skuadrat e fundit janë të ndara me vetëm pak pikë dhe java e 32-të mund të japë verdikte të parakohshme për mbijetesën. Presioni është maksimal, gabimet nuk falen dhe çdo ndeshje është si finale. Java e 32-të nuk është thjesht një tjetër raund kampionati, është një pikë kthese. Mund të afrohemi drejt kurorëzimit të kampionit, mund të qartësohen skuadrat e “playoff”-it dhe mbi të gjitha, mund të marrim sinjale të forta për ekipet që do të bien nga kategoria. Në këto 180 minuta të mbetura, matematika fillon t’i lërë vendin emocioneve. Dhe në fund, si gjithmonë, do të fitojnë ata që gabojnë më pak.

SOT, ORA 15:00 LAÇI – KUKËSI

Laçi ka luksin të luajë pa presion për mbijetesë, por me një objektiv madhor: titullin. Diferenca me Skënderbeun është minimale dhe çdo hap fals mund të kushtojë vendin e parë. Në anën tjetër, Kukësi vjen me “thikën në fyt”. Çdo pikë është jetike për të mbajtur gjallë shpresat e qëndrimit në kategori. Kjo përballje është një duel mes ambicies për lavdi dhe nevojës për mbijetesë – një kombinim që zakonisht prodhon ndeshje të forta dhe të paparashikueshme.

POGRADECI – SKËNDERBEU

Një derbi rajonal me shumë histori, por këtë herë me emocione të ndryshme. Skënderbeu kërkon vetëm fitoren për të mbajtur vendin e parë, ndërsa Pogradeci hyn në këtë sfidë në një moment jo të qetë, mes tensioneve të brendshme. Pezullimi i kapitenit dhe përplasjet në skuadër mund të ndikojnë ndjeshëm në performancë. Megjithatë, fakti që nuk kanë presion rezultati mund t’i bëjë liqenorët një kundërshtar të rrezikshëm.

KASTRIOTI – LUFTËTARI

Një përballje direkte për mbijetesën. Kastrioti ka një avantazh të lehtë në renditje, por nuk është aspak i sigurt. Luftëtari, nga ana tjetër, kërkon të përfitojë maksimalisht dhe të dalë nga zona e rrezikut. Ky është një nga ato takime ku një gol mund të vlejë sa një sezon i tërë.

BURRELI – LUSHNJA Dy skuadra që luhaten mes mbijetesës dhe shpresës për diçka më shumë. Burreli ka ende një shans matematikor për “play-off”, ndërsa Lushnja lufton për të shmangur rënien. Presioni është më i madh te miqtë, por kjo mund të jetë një ndeshje shumë e balancuar dhe e luftuar deri në fund.

BESA – KORABI

Besa mban një vend në zonën “play-off”, por nuk është aspak e sigurt. Korabi është shumë pranë dhe një fitore në këtë përballje direkte mund të përmbysë gjithçka. Kjo është një finale e vogël për fazën “play-off”, ku diferencat janë minimale dhe çdo detaj mund të bëjë diferencën.

ILIRIA – APOLONIA

Iliria është relativisht e qetë në mesin e tabelës, por ende me një sy nga “playoff”-i. Apolonia, ndërkohë, është në një situatë të vështirë dhe ka nevojë urgjente për pikë. Motivimi i miqve është më i madh, por Iliria ka treguar stabilitet gjatë sezonit dhe nuk është një kundërshtar i lehtë.

SOT

Laçi-Kukësi 15:00

Pogradeci-Skënderbeu 15:00

Kastrioti-Luftëtari 15:00

Burreli-Lushnja 15:00

Besa-Korabi 15:00

Iliria-Apolonia 15:00

PANORAMASPORT.AL

---