Berni Ekleston nuk e ka humbur aspak instinktin e tij. Edhe në moshën 95-vjeçare, njeriu që ndërtoi perandorinë e Formulës 1 vazhdon ta analizojë kompeticionin me një kthjelltësi mbresëlënëse dhe me një sinqeritet që gjithmonë shkakton debat.

Në kulmin e sezonit, britaniku ka bërë të qartë parashikimin e tij për kampionatin botëror dhe nuk lë vend për dyshime, pasi për të do të fitojë ose Kimi Antoneli, ose Maks Vershtapen. Kjo do të thotë se ai e përjashton Xhorxh Rasëllin nga gara për titull, ndonëse britaniku konsiderohej favorit para nisjes së sezonit.

“EFEKTI ANTONELI” LË RASËLLIN NË HIJE Edhe pse Mercedes po dominon sërish në pistë, vëmendja nuk është më te piloti që pritej të udhëhiqte skuadrën. Shpërthimi i Kimi Antonelit ka thyer çdo parashikim. Talenti italian 19-vjeçar ka kaluar nga statusi i një premtimi të madh në realitetin më impresionues të këtij sporti. Fitorja e tij e tretë radhazi në Majemi jo vetëm që heshti skeptikët, por ktheu entuziazmin në Itali në një kërkesë kombëtare dhe në një pritshmëri globale në “paddock”. Pas vetëm katër garash, Antoneli ka krijuar një epërsi prej 20 pikësh ndaj Rasëllit, i cili po sheh i pafuqishëm sesi “fëmija i mrekullueshëm” i ka marrë kontrollin emocional dhe teknik të garazhit. Për Eklestonin, ky ndryshim është i pakthyeshëm. Veterani britanik beson se italiani ka kapërcyer çdo fazë normale të adaptimit dhe tashmë është gati për fronin e Formula 1.

VERSHTAPEN RIKTHEHET NË LOJË Por, nëse dikush mendon se dominimi i Mercedesit do të vazhdojë pa pengesa, Ekleston paralajmëron se Maks Vershtapen mbetet një kërcënim real. Pavarësisht një fillimi të paqëndrueshëm të sezonit, ku holandezi mbeti 74 pikë pas Antonelit, Red Bulli duket se ka rikuperuar terren. Përmirësimet e sjella nga skuadra e Milton Keynes në Çmimin e Madh të fundit kanë ndryshuar ndjeshëm performancën e “RB22”. Ekleston u shpreh kështu për progresin e skuadrës austriake: “Red Bull duket se e ka kaluar krizën. Maks është rikthyer në formën e tij më të mirë dhe kur ndodh kjo, ai bëhet shumë i rrezikshëm”, paralajmëroi Berni. Historia e sezonit të kaluar i jep të drejtë, pasi Vershtapen ka treguar më parë se di të rikthehet fuqishëm dhe të dominojë rivalët në pjesën e dytë të kampionatit.

NJË FINALE SEZONI SPEKTAKOLARE Ekspertëve kjo histori po u tingëllon gjithnjë e më familjare. Nëse gara e Majemit ka qenë vërtet pika e kthesës për Red Bull, atëherë Formula 1 mund të përjetojë një duel brezash si rrallëherë më parë. Në njërën anë është guximi dhe talenti i pastër i Antonelit, që po fluturon drejt titullit të parë botëror. Në anën tjetër qëndron përvoja dhe egërsia sportive e Vershtapenit, i cili refuzon të dorëzojë fronin e tij. Për momentin, profecia e Eklestonit është hedhur në tavolinë dhe zakonisht Berni rrallë gabon.

ARTIN LLESHAJ-PANORAMASPORT.AL

---