Frika më e madhe është konfirmuar: Lenart Karl do ta humbasë Kupën e Botës për shkak të një dëmtimi. Vetëm pak ditë para fillimit të turneut, kombëtarja gjermane ka pësuar një goditje të rëndë. Në vend të tij është ftuar tani Asan Ouedraogo.

 

Karl do të mungojë në turneun e parë madhor të karrierës së tij për shkak të një këputjeje muskulore në pjesën e përparme të kofshës së majtë. Ai e pësoi këtë dëmtim gjatë seancës së fundit stërvitore para provës gjenerale të Kupës së Botës kundër SHBA.

“Nuk di as nga t’ia filloj, por më dhemb jashtëzakonisht shumë që duhet të humbas turneun më të madh,” shkroi Lenart Karl në një deklaratë të shkurtër në Instagram. Pak më parë, Federata Gjermane e Futbollit (DFB) kishte njoftuar largimin e detyruar të sulmuesit nga Kupa e Botës. “Kam bërë gjithçka për të qenë gati për Kupën e Botës,” tha Karl. Megjithatë, një rezonancë magnetike (MRI), e kryer pas seancës së fundit stërvitore para provës gjenerale kundër SHBA, konfirmoi frikën e tij më të madhe. “Fatkeqësisht, dëmtimet vijnë shpesh në momentet më të këqija,” shkroi Karl.

Ai do të zëvendësohet në ekipin kombëtar gjerman nga Asan Ouedraogo, i cili është grumbulluar së fundmi dhe do t’i bashkohet skuadrës. Trajneri i kombëtares, Julian Nagelsman, e konsideron lojtarin e Lajpcigut, i cili është vetëm pak më shumë se dy vjet më i madh se Karl, si një futbollist “jashtëzakonisht të talentuar”. Sipas tij, Ouedraogo duhet të luajë “me guxim dhe pa asnjë frenim”.

Ndërkohë, Karl do ta ndjekë turneun vetëm si spektator, por ai mbetet mbështetës i zjarrtë i kombëtares gjermane. “I uroj ekipit tim suksesin maksimal dhe sigurisht që do t’i mbështes në çdo minutë,” tha lojtari i Bajernit.

Ndërsa Nagelsman do të duhet të bëj pa “lojën e tij të lirshme, intuitën në fushë dhe shpejtësinë”, Karl po shikon përpara me optimizëm. “Do të kthehem më i fortë, këtë e premtoj,” tha talenti i ri me besim, duke falënderuar gjithashtu të gjithë për “mesazhet e shumta mbështetëse” që mori pas njoftimit të dëmtimit.

KLAJDI BAJO –  PANORAMASPORT.AL

---