Pas fitores 2-0 ndaj Pogradeci, Laçi ka siguruar matematikisht rikthimin në Superiore për sezonin e ardhshëm. Në përfundim të sfidës, trajneri i kurbinasve, Naxhi Shensoj, për mediat u shpreh:

“E merituam triumfin dhe rikthimin në Superiore. Gjatë gjithë sezonit kemi bërë një punë shumë të mirë. Patëm një periudhë të vështirë në fillim, por më pas gjetëm ritmin dhe identitetin e lojës. Kjo skuadër e meriton Superioren.

Pogradeci është një rival shumë i fortë, por ne treguam se jemi më të mirë. Lojtarët zbatuan në mënyrë perfekte idetë taktike dhe fituam me meritë. Që në fillim kërkuam presing të lartë dhe i bëmë të kuptojnë se nuk kishin hapësira ndaj nesh. Nuk mund të bëja më shumë si trajner, duke marrë parasysh që e mora skuadrën në mes të sezonit. Edhe pse fillimi nuk ishte i lehtë, nuk u dorëzova. Ishte kënaqësi të punoje me këtë grup lojtarësh. Bonusi? Mjafton telefoni nga gruaja ime, ai është bonusi më i madh për mua”.

Sa i përket të ardhmes, trajneri la gjithçka të hapur: “E dua këtë klub, këtë skuadër dhe këtë fanellë. Do të ulem të bisedoj me drejtuesit dhe pastaj do të vendosim se çfarë do të bëjmë për sezonin e ardhshëm”.

ABDULLA DUSHKU – PANORAMASPORT.AL

---