E largojnë nga Shpresat si i dëmtuar, shfaqet në stërvitje rregullisht me Partizanin
Mister me Tedi Carën. Sulmuesi i ri i Partizanit, në teori duhej të ishte pjesë e Shpresave për ndeshjet e radhës të kuqezinjve të drejtuar nga Alban Bushi, të cilët përballen me Slloveninë dhe Kosovën. Lojtari u largua nga grumbullimi si i dëmtuar, por është shfaqur që në ditën e parë të stërvitjeve për këtë javë me Partizanin në fushën stërvitore me të kuqtë.
FSHF bëri të ditur një ditë më parë se Cara nuk mund të ishte pjesë e përfaqësueses për ndeshjet e radhës për shkak dëmtimi dhe kishte lënë grumbullimin e kuqezinjve. Por duket se ai dëmtim nuk e ka penguar lojtarin që të dalë rregullisht në stërvitje sot me të kuqtë.
Ka qenë vetë klubi kryeqytetas që ka postuar foto në rrjetet sociale nga seanca e sotme stërvitore dhe aty shfaqet Cara duke u stërvitur me shokët e skuadrës për ndeshjet e radhës të Partizanit. Një situatë e mistershme për lojtarin i cili në fakt nuk ka pasur një rol qendror në planet e Shpresave. Ai ka luajtur vetëm në një nga ndeshjet ndaj Andorrës si titullar, ndërsa në takimin tjetër ndaj saj si dhe në ndeshjen e fundit ndaj Sllovenisë, ka qenë zëvendësues.
PANORAMASPORT.AL
NDIQE LIVE "PANORAMA TV"