Ndeshja e Shqipërisë U19 ndaj Norvegjisë sot ka shfaqur një episod që normalisht duhet të jetë i papranueshëm në radhët e një ekipi kombëtar. Mes lojtarëve kishte përplasje dhe pakënaqësi për një penallti të akorduar në favor të kuqezinjve në startin pjesës së dytë të takimit, kur rezultati ishte 2-0 për Norvegjinë.

Kulla gjuajti nga distanca, portieri grushtoi dhe Blini tentoi përsëri portën, por një mbrojtës norvegjez devijoi me dore sferën jashtë dhe gjyqtari nuk hezitoi të bënte shenjë nga pika e bardhe e penalltisë.

Blini mori topin dhe ia la në duar Durmishit i cili po shkonte drejt tij, i gatshëm të gjuante penalltinë. Ndërkohë, Kulla shkoi në drejtim të sulmuesit dhe kërkoi të ishte ai gjuajtësi, por duke mos marrë asnjë reagim nga shoku i skuadrës, ndërsa të tjerë e shtynin të largohej.

Kjo bëri që lojtari të dilte i inatosur nga zona, duke bërë shenjë edhe nga pankina që ta zëvendësonin, ndërsa disa futbollistë u munduan ta qetësonin. Nga ana tjetër, Durmishi nuk reagoi dhe u përqendrua që të gjuante penalltinë, të cilën për fat të keq e gaboi.

SHIH VIDEON

Si për ironi të fatit, Durmishi u zëvendësua pak minuta më vonë, ndërsa Kulla i cili kishte kërkuar të largohej, u mbajt në fushë dhe u bë protagonist pasi shënoi dy golat që e mbyllën ndeshjen me barazimin 2-2.

PANORAMASPORT.AL

---