Nuk e harron shkarkimin nga Milani, Fonsekës si del e keqja me drejtuesit: S’më pritën si Amorimin, klubi më i rëndësishëm se lojtarët
Paulo Fonseka nuk e ka harruar mënyrën si u largua nga Milani dhe ka folur për emërimin e një tjetër portugezi, siç është Ruben Amorim. Ai është shprehur i zhgënjyer se si u trajtua nga kuqezinjtë.
Milani është ende një plagë e hapur dhe kush e di nëse do të shërohet ndonjëherë…
“Jam i zhgënjyer, po, sepse dy vjet më parë më thirrën për një arsye: për të ndryshuar stilin e lojës së ekipit. ‘Ne duam që Milani të bëhet dominues, të ketë topin dhe të luajë në gjysmën e kundërshtarit’, më thanë klubi. Perfekt, u përgjigja, kjo është e njëjta ide që kam për futbollin.”
E njëjta ide dhe qëllim i shprehur nga Ruben Amorim, trajneri i ri i kuqezinjve…
“Por e vërteta është se ndryshimi kërkon kohë dhe të luash këtë lloj futbolli në Itali nuk është e lehtë. Për ta arritur këtë, së pari duhet të ndryshosh mentalitetin e lojtarëve. Mund të dukem arrogant, por unë po shkoja në atë rrugë dhe pas kësaj, nuk e pashë kurrë Milanin të luante në mënyrën që luante me mua në stol.”
Atij nuk iu dha kjo mundësi, në dhjetor 2024 u shkarkua pas një barazimi në shtëpi me Romën…
“U largova shumë i qetë sepse bëra gjithçka që munda për të ndryshuar Milanin. Për ta mbrojtur atë. U largova me ndërgjegje të pastër sepse gjithmonë e kam vënë Milanin para të gjithëve të tjerëve dhe nuk ishte e lehtë. Gjithmonë e kam mbrojtur klubin para lojtarëve. Lojtarët nuk janë më të rëndësishëm se Milani. Megjithatë, në Itali, lojtarët shpesh peshojnë më shumë se klubi. Nëse dikush, edhe një lojtar i mirë, nuk e meritonte, nuk do të luante me mua, sepse asnjë lojtar nuk është më i madh se Milani. U kritikova për këtë, por pata guximin të mbroja Milanin. Shpresoj që të gjithë e kuptuan se nuk mund të përballosh të kesh lojtarë që nuk japin gjithçka për Milanin. PSG fitoi dy Liga Kampionesh radhazi pasi la të lirë lojtarë që nuk ishin në lartësinë e detyrës. Në Paris, ata e kuptuan se asnjë lojtar nuk është më i rëndësishëm se skuadra. Nuk e di nëse e kuptuan këtë edhe në Milano. Më duket se gjërat janë pak më ndryshe tani, sepse pashë që Amorim mbërriti në Milanello dhe Kardinale ishte atje duke e pritur. Kur mbërrita unë, nuk kishte askënd atje.”
Kur kujton përvojën tënde te Milani, a je më shumë krenar që ke luajtur dhe fituar ndeshje si ajo në Madrid apo i zhgënjyer nga mënyra se si përfundoi?
“Do të jem i sinqertë, të dyja gjërat së bashku.”
PANORAMASPORT.AL
