Në qytetin e Elbasanit u zhvillua edicioni i radhës i Kupës së Shqipërisë në Atletikë, aktivitet që mblodhi afro 200 sportistë nga 11 ekipe të vendit, në garat për meshkuj dhe femra.Atletët dhuruan rivalitet dhe rezultate të mira në disiplinat e ndryshme, ndërsa shumë sportistë të rinj treguan potencial dhe konkurrencë të fortë. Në qendër të vëmendjes ishin padyshim Luiza Gega dhe Muhamet Çengeli, të cilët u shpallën sportistët më të mirë të aktivitetit.

Gega, atletja më e madhe e historisë së Shqipërisë, grumbulloi 1035 pikë, ndërsa Çengeli 1079 pikë, duke qenë protagonistë absolutë në disiplinat e tyre. Vllaznia u shpall ekipi më i mirë për meshkuj me 170 pikë, ndërsa Tirana triumfoi te femrat me 158 pikë, skuadër dominuese absolute, e drejtuar nga trajneri Taulant Stërmasi.

REZULTATET – Garat e hedhjeve prodhuan rezultate interesante. Në hedhjen e shtizës për meshkuj triumfoi Besmir Ustalli i Tiranës me rezultatin 46.37 metra, ndërsa te femrat më e mira ishte Mei Sokoli e Partizanit me 34.38 metra. Në hedhjen e diskut fitoi Admir Dizdari i Teutës me 38.10 metra, kurse Selma Pasho e Skënderbeut dominoi te femrat me 22.80 metra. Pasho ishte protagoniste edhe në hedhjen e gjyles, ku siguroi vendin e parë me 8.50 metra, ndërsa te meshkujt triumfoi Joan Deli i Skënderbeut me 12.28 metra.

Sidrit Kopliku i Vllaznisë zhvilloi një paraqitje shumë të mirë duke fituar garën e 800 metrave me kohën 1:57.03 dhe më pas edhe atë të 1500 metrave me 4:04.62. Te femrat, në 800 metra triumfoi Relaksa Dauti e Tiranës me 2:09.14, ndërsa në 1500 metra vendin e parë e mori Kristina Puro e Tiranës me 4:54.17. Në garën e 3000 metrave shkëlqeu sërish Luiza Gega, të cilën nuk mund ta rivalizojë askush as nga meshkujt dhe jo më në radhët e femrave. Gega fitoi bindshëm me kohën 9:21.61, duke treguar diferencën dhe eksperiencën e saj në pistë. Te meshkujt, fitues u shpall Redon Goskova i Partizanit me kohën 9:43.42. Ndërkohë, në 5000 metra për femra, Redia Dauti e Tiranës siguroi vendin e parë me kohën 16:40.98. Në ecjen sportive 5000 metra, Ejona Cufa e Tiranës zhvilloi një garë të mirë duke e mbyllur me kohën 29:09.43.

Sprintet sollën rivalitet dhe emocione deri në finish. Në 100 metra për meshkuj fitoi Endri Rakaj i Vllaznisë me kohën 10.74 sekonda, ndërsa te femrat më e shpejta ishte Phoebe Mustafaraj e Tiranës me 12.11 sekonda. Në 200 metra triumfoi Leandro Çardaku i Vllaznisë me 22.09 sekonda, ndërsa Alisia Qiko e Skënderbeut fitoi te femrat me 25.35 sekonda. Gara e 400 metrave u fitua nga Noah Pavaci i JG me kohën 48.79 sekonda, ndërsa Iljana Beqiri e Tiranës doli e para te femrat me 56.21 sekonda. Durjon Idrizaj i Vllaznisë fitoi 100 metrat me pengesa për meshkuj me 15.83 sekonda, ndërsa Rexhina Berami e Partizanit triumfoi te femrat me 15.21 sekonda.

Në 400 metra me pengesa për femra, vendin e parë e siguroi Livja Topi e Skënderbeut me kohën 1:04.81. Në disiplinat e kërcimeve, një nga rezultatet më të mira të aktivitetit erdhi nga Muhamet Çengeli i Vllaznisë, i cili fitoi kërcimin së gjati me rezultatin shumë të mirë 7.73 metra, rezultat që i dha edhe titullin “sportisti më i mirë” i Kupës. Te femrat triumfoi Erisa Rrasa e Vllaznisë me 5.52 metra. Në kërcimin trehapësh, fitues dolën Kolindo Kiri i Vllaznisë me 13.48 metra dhe Marilena Gjata e Mjeksisë Sportive me 11.40 metra. Ndërkohë, në kërcimin së larti për femra fitoi Rexhina Berami e Partizanit me rezultatin 1.55 metra. Në garën stafetë 4×100 metra për femra, ekipi i Tiranës siguroi vendin e parë me kohën 48.38 sekonda, duke vulosur një paraqitje shumë të mirë të ekipit kryeqytetas në këtë Kupë.

VLADIMIR MEMA-PANORAMASPORT.AL

---