Arda Saatçi, vetëm 28 vjeç, e ka fituar me meritë nofkën “cyborg” sa herë që përmendet emri i tij. Në vitet e fundit, ai ka realizuar disa sfida fizike në kufijtë ekstremë të rezistencës. Në vitin 2024 përshkoi afro 3.000 kilometra mes Berlinit dhe Nju Jorkut, ndërsa një vit më vonë përshkroi Japoninë pasi përfundoi 72 maratona në 43 ditë. Të dyja këto sfida ishin pjesë e “Cyborg Season”, një seri projektesh ultra-rezistence që ndërthurin performancën sportive elitare me transmetime “live” dhe një lidhje të vazhdueshme me komunitetin e ndjekësve të tij.

Filozofia e tij, e përmbledhur në moton “Ti kundër vetes”, e ka shndërruar çdo sfidë sportive në një fenomen viral. Tani, gjermani ka realizuar sfidën e tij më ekstreme, të përshkojë 604,6 kilometra nga Lugina e Vdekjes deri te moli i Santa Monikës në Los Anxhelos, për pak më shumë se pesë ditë. Aventura nisi më 5 maj, në orën 11:00 të mëngjesit, kur ai u nis nga Badëater Basin, pika më e ulët e Shteteve të Bashkuara, e vendosur 85,5 metra nën nivelin e detit. Përpara e prisnin rrugë shkretëtire, shtigje zhavorri në zona rurale, segmente përgjatë “Route 66” historike, pranë autostradave të ngarkuara dhe, në fund, korridore urbane drejt Los Anxhelosit. Pesë ditë më vonë, më 10 maj në orën 14:29, Saatçi mbërriti në molin e Santa Monikës.

I rraskapitur, i emocionuar dhe i rrethuar nga qindra njerëz, ai përqafoi nënën e tij ndërsa turma festonte mbërritjen. “E arritëm! Ka jashtëzakonisht shumë njerëz këtu! Është e pabesueshme!”, tha ai pasi përfundoi itinerarin. “Synoni gjithmonë më lart, edhe kur gjërat nuk shkojnë në mënyrë perfekte, dhe mos e krahasoni veten me askënd. E rëndësishme është të ndiqni rrugën tuaj”, deklaroi berlinasi. Asgjë nuk ishte e improvizuar. Ai u përgatit për muaj të tërë me stërvitje deri në 100 kilometra dhe me një bllok total prej 242 kilometrash në shtatë ditë, si edhe me simulime të vapës ekstreme në pistë vrapimi duke përdorur veshje speciale termike. Gjithashtu kreu prova privimi nga gjumi deri në 32 orë për ta përshtatur trupin me kushtet më të vështira të mundshme.

1.5 LITRA LËNGJE TË HUMBURA NË ORË

Saatçi u përball me temperatura rreth 40 gradë Celsius, me asfalt që arrinte deri në 60°C dhe lagështi jashtëzakonisht të ulët, mes 10% dhe 20%. Në këto kushte, ai humbiste deri në 1.5 litra lëngje në orë. Gjatë itinerarit dogji afërsisht 75.000 kalori dhe iu desh të konsumonte rreth 15.000 kalori në ditë për ta mbajtur trupin funksional. Çdo orë merrte deri në 90 gram karbohidrate dhe mes 800 e 1.000 miligramë sodium. Edhe ritmi i zemrës tregonte konsumimin ekstrem, duke mbajtur një mesatare pranë 90 rrahjeve në minutë dhe duke arritur kulme deri në 165. Mungesa e gjumit u kthye në momentin më kritik të gjithë sfidës.

Pasi kaloi 320 kilometra gjatë ditës së tretë, nisën halucinacionet. Lodhja e detyroi Saatçin të ndalonte dhe t’i nënshtrohej një kontrolli mjekësor përpara se të flinte për 90 minuta. “300 kilometrat u ndjenë si 3.000”, pranoi ai gjatë rrugëtimit. Era përballë, terreni i vështirë dhe temperaturat e larta ia ngadalësuan ritmin deri në 10 minuta e gjysmë për kilometër në disa segmente. Megjithatë, pasi rikuperoi disi energjitë gjatë natës, ai rifitoi ritmin dhe përshpejtoi në zbritjet e “Route 66” historike, duke vrapuar madje nën gjashtë minuta për kilometër.

Pas 123 orësh e 21 minutash ai përfundoi 604,6 kilometra, 4,6 kilometra më shumë se sa ishte planifikuar fillimisht për shkak të një rrëshqitjeje dheu — si edhe një disnivel pozitiv prej afro 6.000 metrash, ekuivalente me më shumë se 14 maratona në pesë ditë. Edhe pse ishte i shoqëruar nga një ekip teknik i drejtuar nga fizioterapisti Gzim Ferizi, beteja ishte thellësisht mendore. Saatçi u përball i vetëm me konsumimin fizik, dhimbjen dhe lodhjen ekstreme. Megjithatë, mbështetja e njerëzve u kthye në një karburant emocional për të.

NJË SFIDË E NDJEKUR NGA ALABA DHE RUDIGER

Gjatë itinerarit, disa persona iu bashkuan spontanisht. Krijuesi suedez i përmbajtjes Marlon Lundgren Garcia vrapoi rreth 17 kilometra në krah të tij në Los Anxhelos, ndërsa një ndjekës udhëtoi nga San Diego vetëm për ta shoqëruar për disa minuta. “Ndihem shumë i nderuar që mund t’u jap diçka njerëzve përmes kësaj sfide. Në fund, nuk bëhet fjalë vetëm për mua”, tha Saatçi, i cili ka më shumë se 2.5 milionë ndjekës në rrjetet sociale.

Jehona e kësaj aventure shkoi përtej botës së sportit. Figura si futbollistët David Alaba, Antonio Rudiger dhe David Raum, si edhe atletja Alica Schmidt, influencerja e fitnesit Pamela Reif dhe reperi Luciano ndoqën transmetimin dhe vlerësuan publikisht forcën e tij mendore. Saatçi, në mes të shkretëtirës dhe nën një vapë përvëluese, arriti të tregojë deri ku mund të shkojë njeriu kur vendos të mos ndalet.

PANORAMASPORT.AL

---