Pas 5 javësh, Teuta ka rigjetur fitoren në Superiore, pasi ka mposhtur 1-0 në “Elbasan Arena” Dinamon. Fati i kësaj sfide u vendos nga një autogol i portierit dinamovit, Edvan Bakaj, në minutat e para të pjesës së dytë. Durrsakët tashmë ngjiten në renditje dhe hedhin vështrimin nga kreu.

Në intervistën e dhënë për “Panorama Sport”, Emiljano Vila shprehet i lumtur për suksesin ndaj Dinamos, si dhe beson fort se ky ekip do të shkojë në rrugën e duhur, ashtu siç vepruan në sezonin e fundit ku u shpallën edhe kampionë.

Emiljano, sa vlejti ai sukses ndaj Dinamos?
Vlen tri pikë dhe një hap përpara. Ekipi bëri atë që duhej të fitonte ndeshjen, por ky sukses na jep besim për sfidat e radhës. Edhe pse me rezultat minimal, ishte një trepikësh me shumë vlera, mjaftueshëm për të qenë pranë kreut të tabelës së klasifikimit. U pa një Teutë me dëshirën për të fituar e qarkullim të topit në të gjithë sektorët e fushës.

Po sulmin e skuadrës si e shihni këtë sezon?
Nuk kam parë një sulm në vështirësi. Në ndeshjen e fundit ne duhet të vertikalizonim më shumë, por ekipi u shfaq i rregullt. Mund të them se vazhdimësia ka qenë pika jonë e fortë, por dhe kemi shpërdoruar shumë. Ajo që ka rëndësi, megjithatë, është fitorja dhe ne e arritëm me dëshirën e duhur. Tani le të mendojmë për ndeshjen e radhës ndaj Kukësit.

A ishte fitorja ndaj Dinamos një mesazh për rivalët?
Ne duhet t’i japim mesazh vetes, por është gjithashtu e vërtetë që këtë javë fituam, ashtu si edhe rivalët. Duhet të rikuperojmë dhe të bëjmë mirë, sepse kemi karakteristikat tona të rëndësishme e mund të arrijmë gjëra të rëndësishme si në të shkuarën.

Të hënën prisni Kukësin, sa e vështirë do të jetë kjo ndeshje?
Pa dyshim që Kukësi kërkon përqendrim maksimal, pasi është një skuadër shumë e mirë dhe ka cilësi brenda. Gjithsesi, kundër Kukësit do të kërkojmë të ruajmë vazhdimësinë duke marrë një tjetër fitore.

Pra, objektivi në këtë ndeshje janë tri pikët?
Është një ndeshje shumë e fortë, si të gjitha përballjet e tjera. Ne do të futemi për ta fituar këtë takim. Kukësi ka bërë mirë deri më tani, por duhet ta mundim. E kemi hedhur pas krahëve fitoren ndaj Dinamos dhe duam të shfaqim vlerat tona më të mira të hënën. Fitorja është detyrim, edhe pse në futboll nuk ka detyrime. Duhet të luajmë për ta fituar ndeshjen dhe duhet të marrim tri pikë patjetër.

I druheni Kukësit në këtë përballje?
Nuk i druhemi, jo Kukësit, por asnjë kundërshtari. Të gjithë mund të fitojnë apo të gjithë mund të humbasin. Jemi shumë të qetë, nuk kemi presion.

Si mund ta ruajë Teuta titullin?
Nuk e shikojmë shumë kalendarin e të tjerëve, por i yni është shumë i fortë. Kukësi ka cilësi të shkëlqyera, pastaj ose përplasjet direkte, ose skuadrat që luftojnë për shpëtim. Cilësia do të bëjë ndryshimin e ne duhet të bëjmë më pak gabime.

ZAMIR QYPI – PANORAMASPORT.AL

NDIQE LIVE "PANORAMA TV"

---