Vëzhgim i “Panorama Sport”/ Lista, zbulohen 55 talentet kuqezi që luajnë në Itali

Panorama Sport | Lajmet e fundit nga sporti

Postuar: Qershor 26, 2022 | 23:15


Vëzhgim i “Panorama Sport”/ Lista, zbulohen 55 talentet kuqezi që luajnë në Itali

Sezoni që lamë pas, ndryshe nga më për para kur në Serinë A kishim me pikatore futbollistë shqiptarë, ka nxjerrë në fushë shumë lojtarë, disa prej tyre të fiksuar prej vitesh në këtë kampionat. Mund të përmendim këtu Hysajn, Gjimshitin, Ismajlin, Kumbullën apo edhe të tjerë.

dervishi hasa

Por jo vetëm në Serinë A, pasi edhe në nivelet më poshtë, B, C apo D, ka shumë futbollistë shqiptarë që aktivizohen dhe madje disa janë edhe protagonistë e lojtarë kryesorë në ekipet e tyre. Po të vazhdojmë më poshtë, te fidanishtja e moshave, sot Shqipëria ka luksin që të importojë pa fund talente të gjakut dhe të tokës së vet, që janë lindur në Itali. Emigrimi i shqiptarëve pas viteve ‘90 ka krijuar diçka të frytshme, pasi mijëra njerëz kanë krijuar jetën e tyre dhe familjet e tyre në vendin fqinj.

Në ndryshim nga shumë vite më para, kur kalimi i barrierave të një ekipi, qoftë edhe moshash, ishte tepër i vështirë, koha ka bërë që shumë fëmijë shqiptarësh të lindur në Itali që luajnë futboll nuk shihen më si emigrantë. Megjithatë, përshtatja dhe integrimi në Itali ka bërë që pothuajse në çdo ekip moshash, qoftë U-19 apo Primavera siç quhen aty apo edhe në U-17 të ketë nga një shqiptar.

VËZHGIMI – Në një vëzhgim që ka bërë “Panorama Sport”, duke u bazuar edhe në faqen e njohur “Transfermarkt”, janë 55 futbollistë shqiptarë që luajnë vetëm në Itali, duke marrë vetëm skuadrat U-19 dhe ato U-17.

Primavera 1 logo

Ajo që bie në sy, është fakti që skuadra e Sasuolos ka besuar në një numër të lartë shqiptarësh, plot 5 futbollistë, 4 tek U-19 dhe 1 tek U-17. Gjithashtu, interesante është shifra që ka paguar Interi për Kristjan Dervishin, të riun 19-vjeçar i cili luan si mbrojtës krahu. Zikaltrit kanë marrë shërbimet e tij nga Atalanta për 970 mijë euro, një shifër e konsiderueshme.

primavera2 logo

Përveç Romës dhe Milanit që nuk kanë në gjirin e tyre shqiptarë, në ekipet e tjera të mëdha nuk mungojnë: Luis Hasa te Juventusi, Daniel Hysaj te Napoli, Toçi te Fiorentina apo edhe Muhametaj tek Atalanta, që ka një nga akademitë më me emër në Itali.

primavera3 logo

Në tabelat anësore janë të gjithë lojtarët të ndarë sipas kategorisë ku marrin pjesë me ekipin e tyre. Gjithashtu, edhe tek U-17 janë 20 shqiptarë që aktivizohen. Sa u përket pozicioneve, kemi një ndarje të barabartë të reparteve, duke lënë në fund atë të portierëve me 5 të tillë.

primavera4 logo

PRODHIMI VENDAS – Ky vëzhgim është vetëm në Itali, por talentet shqiptare gjenden edhe në shumë shtete të tjera, si në Suedi, Greqi, Zvicër, Kroaci apo Francë. Ndërkohë që tani lind një detyrë tjetër, ajo se çfarë do të bëhet me lojtarët e futbollit vendas, që gjithnjë e më pak po prodhon lojtarë për nivelin kombëtar.

Besimi që atyre u jepet është pothuajse në tokë dhe prioriteti është gjithmonë te importimi i një lojtari të huaj nga rajoni, që siç edhe e kemi parë një pjesë e mirë e tyre kanë dështuar.

KRISTI SEJATLLARI – PANORAMASPORT.AL