– Dritat e “Elbasan Arena”-s ndizen me vonesë, aq sa ekipet dolën për të bërë nxehjen pa u ndezur mirë ato. Një situatë deri diku qesharake, teksa ka qenë tërheqja e vëmendjes nga stafi i Vllaznisë që në stadium të vinin dritat.

– Loja ka qenë mjaft e ashpër në fushë, teksa vetëm brenda pesë minutave stafi mjekësor i Teutës futet në fushë tri herë për t’u dhënë ndihmën lojtarëve.

– Tomas Brdariç ironizon kartonin e kuq të Aralicës, duke duartrokitur vendimin e arbitrit. Më pas, kthehet nga gjyqtari i katërt dhe kërkon shpjegime për këtë vendim në dëm të skuadrës së tij. Pas ndeshjes e pranoi se kartoni i kuq ka qenë i drejtë.

– Gurishta merr karton të verdhë pas një ndërhyrjeje pranë pankinës së tij, kur po qëndronte edhe gjyqtari i katërt. Në këtë moment mbrojtësi kthehet nga Bastari për t’i kërkuar shpjegime.

– Vllaznia kërkon ndëshkimin me një karton të kuq të Xheksonit pas një ndërhyrjeje të tij ndaj Gurishtës me bërryl, por nuk është i këtij mendimi kryesori Alla. Gjatë gjithë ndeshjes duhet thënë se u luajt një lojë e ashpër nga të dyja ekipet.

– Ndryshe nga sa ndodh zakonisht, lojtarët e stolit të Vllaznisë e bënë nxehjen jo krah pankinave, por në një cep pas portës.

– Prania e tifozëve la për të dëshiruar, sepse numri ishte shumë i paktë. Ndoshta për Teutën pritej, por jo për shkodranët.

– Duke parë momentin e mirë të shkodranëve, tifozët e Teutës i bënin thirrje ekipit në fushë: “Luani o kampiona! Luani se jeni edhe një lojtar më shumë!”

– Në këtë ndeshje prishet tradita e pankinave, teksa ekipi vendas, që ishte Teuta, nuk qëndroi nga pankina në të majtë, por në krahun tjetër.

– Në pjesën e dytë, pak para golit të barazimit të Vllaznisë, ka tension në tribuna midis tifozëve të të dyja palëve. U desh ndërhyrja e forcave të policisë për të neutralizuar situatën.

– Në momentin e zëvendësimit, Liridon Latifi shkoi të përqafonte trajnerin, duke mbyllur kështu edhe historinë me nervozizmin e disa javëve më parë.

– Ky barazim në këto kushte për Vllazninë u mirëprit mirë nga tifozët, për më tepër që ishte një ndeshje transferte ndaj kampionëve në fuqi. Në fund të ndeshjes ata i bënë “pritë” ekipit tek autobusi, duke i duartrokitur dhe përshëndetur.

VLADIMIR MEMA – PANORAMASPORT.AL

NDIQE LIVE "PANORAMA TV"

---