Revoltë në Kukës, me tifozët që nuk pranojnë rezultatin dhe futen në fushë, duke detyruar gjyqtarin që të ndërpresë ndeshjen pas golit të dytë të Erzenit në minutën e 64-t. Skuadrat dhe gjyqtarët futen në dhomat e zhveshjes për sigurinë e tyre.

Në ato momente shihet që sende të forta hidhen drejt gjyqtarëve dhe policëve, ku njëri prej tyre goditet në kokë. Pas diskutimeve, nga delegati i ndeshjes jepet urdhri që loja duhet të rifillojë pas zbrazjes së tribunave pas portave, një vendim i cili është ndeshur edhe në kampionatet europiane, ndërsa rrallë e shohim në Superiore. Tribuna mbrapa porte, aty ku qëndrojnë ultrasit, por edhe ajo ballore me qendroren më pas duhet të boshatisen.

Kështu e pësojnë edhe tifozët e Erzenit, të cilët policia i largon të parët për arsye sigurie. Sfida rinis pas plot 25 minutash, në minutën e 64-t të sfidës, aty ku edhe u ndal. Sakaq, pas ndalimit të lojës, tifozët vendës e kanë me federatën duke thërritur “turp-turp” dhe ofenduar në kor.

Situata me dhunimin e fushës nuk është diçka e re për Kukësin, sepse pati ndodhur edhe më herët, ku kulmoi edhe me Partizanin pak javë më parë në momentin e goditjes së penalltisë në fundin e sfidës. Ja momentet më pikante që sjell “Panorama Sport” nga ndeshja në Kukës.

* Ende pa nisur mirë ndeshja, nisin problemet për ekipin e Erzenit për shkak të dëmtimeve. Fillimisht Skerdi Bejzade pati llogaritur për në formacion sulmuesin Marzuk, por ai është dëmtuar gjatë nxehmjes. Në këtë mënyrë në lojë e nisi si titullar Redon Mihana, i cili luan vetëm 45 minuta dhe nuk lë gjurmë.

* Terreni i “Kukës Arena” nuk ishte në ditët e tij më të mira, ku herë pas here lojtarët patën probleme në qarkullimin e topit, duke bërë edhe gabime të shpeshta.

* Tensioni nis që në minutën e 10-të ku Kacbufi kapet me Rivasin, për një goditje me këmbë të futbollistit të Kukësit ndaj atij të Erzenit jashtë vijave kufizuese. Një situatë që tregon edhe presionin e ekipeve në fushë, në një kohë që kryesori e zgjidh me një këshillim për të dy.

* Mbarak has vështirësi për të gjetur shokë të zbuluar dhe shpesh herë u flet që të gjejnë hapësira, pasi nuk ka se ku të dërgojë topin.

* Kahrimanoviç shihet shpesh të kërkojë llogari te gjyqtari për çdo rast të dyshimtë apo për vonesat e lojës së kundërshtarit. Situata në të cilat arbitri i zgjidh duke ia sqaruar vendimet.

* Shokët e skuadrës nervozohen me Maliqin për një goditje që kreu drejt portës dhe nuk preferoi të pasonte te një tjetër lojtar të zbuluar.

* Abdou dhe Rivas përpiqen të vënë në presion Kahrimanoviç në momentin e penalltisë, duke i ushtruar “presion”.

* Beshiraj përpiqet që të qetësojë Tafasin dhe i thotë të mos dorëzohet, duke parë që kapiteni ishte i pezmatuar pas golit të dytë të miqve.

* Tifozët e Kukësit nuk e lënë në baltë skuadrën edhe pas përjashtimit nga ndeshja, pasi qëndrojnë jashtë rrethimit të stadiumit dhe mbështesin ekipin e tyre në minutat e mbetura.

* Në fund ka lot në kampin blu, me lojtarët që shtrihen në fushë, pasi kjo humbje praktikisht i le me një këmbë në Kategorinë e Parë.

VLADIMIR MEMA – PANORAMASPORT.AL

NDIQE LIVE "PANORAMA TV"

---