Nga EDUARD ZALOSHNJA

Qysh kur Nedim Bajrami debutoi me Kombëtaren shqiptare, kam mbajtur statistika të hollësishme për të gjitha minutat që ai ka luajtur me fanellën kuqezi. Sepse fantazist si ai rrallë i kanë ardhur Kombëtares tonë, i fundit në nivelin e tij mund të ketë qenë Ervin Skela.

Në totalin minutave që Bajrami ka luajtur me fanellën kuqezi, pothuajse 74% e aksioneve të rrezikshme tona, kanë patur atë si protagonist, ose me pasimin ndërtues të aksionit, ose me pasimin final para rrezikimit të portës kundërshtare, ose me finalizimin e rrezikshëm të aksionit. Jo më kot, klubi italian, Sasuolo, pagoi 6 milionë euro për transferimin e tij nga Empoli.

Dhe teksa Bajrami po shkëlqente te Kombëtarja jonë, po shkëlqente edhe te Sasuolo, ai ishte protagonist në pozicionin e tij të preferuar të fantazistit para zonës kundërshtare (pozicioni klasik i numrit 10). Por në fund të fazës së parë në Itali, ai pësoi një dëmtim.

Dhe vendin e tij e zuri norvegjezi Thorstvedt. Qysh atëherë, minutat e Bajramit në fushë kanë qenë më të pakta. Edhe kur ka qenë në fushë, ka luajtur më shumë jashtë pozicionit tij të preferuar, ka luajtur si gjysmë-sulmues krahu. Dhe vijmë te ndeshja kundër Kilit.

Në atë ndeshje, Bajrami luajti në pozicionin klasik të numrit “10”, ku ishte i presupozuar që me fantazinë e tij natyrale, të shërbente si një çernierë lidhëse e mesfushës me sulmin. Por mungesa e minutave të lojës në atë pozicion për klubin e tij duket se ndikoi që të mos shihnim atë Bajram që kemi parë gjatë eliminatoreve të Europianit. Kurse në ndeshjen me Suedinë Bajrami luajti si gjysmë-sulmues krahu (siç ka luajtur për Sasuolon muajt e fundit).

Por me Suedinë nuk shkëlqeu, ndoshta edhe pse nuk ishte në pozicionin e tij ideal, por edhe pse mund të jetë jashtë forme.

Në muajt në vazhdim duhet parë se ku dhe si do të luajë Bajrami me Sasuolon. Në qoftë se ai e rikap formën që kishte para janarit, është padiskutim futbollisti ideal për sistemin 4-2-1-3 të Silvinjos (në pozicionin numër “10”). Përndryshe, duhet menduar për një sistem 4-4-2, me katër mesfushorë puro difensivë dhe me vetëm dy sulmues nuhatës të golit…

PANORAMASPORT.AL

NDIQE LIVE "PANORAMA TV"

---