Onana drejt gjigantit të Premier Ligës, Interi përfiton yllin e sulmit dhe një mbrojtës
Andre Onana ka bërë mjaft mirë në sezonin e tij të parë te Interi, duke i marrë menjëherë vendin e titullarit veteranit Handanoviç.
Ai ka marrë menjëherë vëmendjen e klubeve të mëdha në Europë dhe një prej tyre është edhe Çelsi.
Gjiganti anglez është në kërkim të një portieri, pasi Kepa Arrizabalagës pritet mos t’i jepet besim sezonin e ardhshëm, ndërsa Eduard Mendi prej kohësh e ka humbur vendin e titullarit.
Për këtë arsye gardiani nga Kameruni është i pari në listë për këtë pozicion dhe i gatshëm të përfitojë nga ky transferim është edhe Interi.
Gardiani 26-vjeçar vlerësohet plot 40 milionë euro, por Çelsi është e gatshme t’i ofrojë jo një, por dy lojtarë zikaltërve.
I pari është pikërisht Romelu Lukaku. Sulmuesi belg nuk është më i mirëpritur te Çelsi dhe për këtë arsye “Blutë” janë të gatshëm që ta largojnë atë menjëherë. Nga ana tjetër, te Interi janë në mëdyshje nëse duan ta mbajnë ose jo.
I dytë është Trevoh Çalobah. Mbrojtësi anglez nuk preferohet më nga Graham Poter dhe për këtë arsye ai shihet si një opsion i mirë për të zëvendësuar Milan Skriniar, i cili do të largohet drejt PSG-së në verë.
Sa i përket zëvendësuesit të Onanës, Interi ka menduar për xhuliemo Vikarion. Portieri 26-vjeçar i Empolit ka treguar se është gati të mbrojë portën e një skuadre të madhe dhe për këtë arsye Interi është vënë prej kohësh në ndjekje të tij.
Gjithsesi për italianin, zikaltërit do të duhet të mposhtin dhe konkurrencën e Juventusit, pasi dhe kjo e fundit do të jetë e gatshme ta transferojë në verë gardianin.
PANORAMASPORT.AL
NDIQE LIVE "PANORAMA TV"