“Ndez” edhe Vora e Zjarrit, fiton pas 6 humbjesh radhazi. Vorakët sigurojë matematikisht zonën “play off”
Pas 6 humbjeve radhazi Vora e drejtuar nga trajneri Endri Zjarri ka “ndezur” duke u rikthyer te fitorja duke mundur Tomorin në shifrat 3-0. Edhe pse ka vuajtur rreth 60 minuta për të dalë te goli, vorakët në fund shënuan tre herë dhe kanë siguruar edhe matematikisht pjesëmarrjen në fazën “play off”.
Kronika e ndeshjes flet për një epërsi të skuadrës së Vorës, ku në 45 minutat e para u regjistruan 7 raste, por pa mundur që të gjendet rruga e golit. Fraksioni i dytë dha një tablo tjetër, ku Vora arriti që në minutën e 62-të të zhbllokojë rezultatin me një gol të bukur të shënuar nga 20 metra nga kapiteni Xhuljo Tabaku. Pas 10 minutash vendasit shënojnë edhe golin e dytë me anë të Raboshtës.
Në kohën shtesë, vorakët gjejnë edhe golin e tretë, këtë radhë me anë të Prengës, i cili realizon një supergol, me një gjuajtje ballore pranë harkut të zonës dhe vulos shifrat në 3-0. Me këtë fitore, Vora ruan vendin e katërt dhe kërkon të mos e lëshoj atë, pasi ka mundësinë e fitimit të një ndeshje “play_off” në fushën e vet. Ndërkohë që Tomori ka kryer punë për këtë sezon dhe ndeshjet që po luhen janë më shumë për të promovuar të rinjtë.
Trajneri i Vorës- Pas ndeshjes, trajneri i Vorës, Endri Zjarri, tha: “Për ne ishte e rëndësishme që të ktheheshim te rezultati pozitiv, pas një seri të gjatë negative. Pësuam 6 humbje radhazi dhe ky sukses duhet të na shërbejë si një pikënisje që të shohim vetëm përpara për të qenë të gatshëm për fazën e “play off”. Më e rëndësishme për ne është që të risim nivelin e lojës. Deri në “play off” kemi ndeshje të vështira ndaj dy kryesuesve, por që do të shërbejnë si një motiv i madh në fushën e lojës. Shpresojmë të bëjmë paraqitje të mira e të marrim rezultate pozitive deri në fund”.
ABDULLA DUSHKU
NDIQE LIVE "PANORAMA TV"