Meto rikthehet tek Apolonia: Skuadra e zemrës, kapim elitën

Panorama Sport | Gazeta me e shitur sportive ne vend

Postuar: Shtator 14, 2018 | 13:54

Meto rikthehet tek Apolonia: Skuadra e zemrës, kapim elitën

Apolonia ka fituar ndeshjen e vajtjes së turit të parë të Kupës së Shqipërisë. Fierakët kanë luajtur në “Gjorgji Kyçyku” të Pogradecit dhe kanë fituar minimalisht 1-0, me gol të shënuar nga mesfushori Ksement Mehmeti. Është ndeshja e dytë zyrtare e këtij sezoni për Apoloninë, luajtur të dyja në transfertë, një për kampionat e një për kupë dhe që të dyja fituar me të njëjtin rezultat, ku bardhejeshilët janë treguar skuadër që nuk fal dhe cinike në kulm.

41392613_2242203882674210_3986779744422068224_n

Pas fitores në Cërrik për llogari të kampionatit, Miho ka bërë plot 4 ndryshime në formacionin bazë për kupë, duke hedhur në fushë qysh nga minuta e parë edhe të riun e talentuar, 17-vjeçarin Zoga. “Duam vazhdimësinë nga ndeshja në ndeshje, të ruajmë frymën e grupit dhe të forcojmë mentalitetin e fituesit. Loja jonë nuk është ngjitur akoma në mundësitë e skuadrës, por dy fitore në dy ndeshje janë pozitive për ne, pasi ndikojnë në psikologjinë e ekipit”, thotë trajneri i Apolonisë.

Ribaj dhe Meto

VJEN AGIM METO Bardhejeshilët e kanë lënë pas “telenovelën Ribaj” dhe kanë bërë një goditje të zgjuar e cilësore në momentet e fundit të merkatos. Pjesë e Apolonisë është bërë mesfushori fierak, Agim Meto, një lojtar me aq përvojë në Superligë dhe Kategorinë e Parë, pasi ka luajtur në të shkuarën për Apoloninë, Bylisin, Flamurtarin, Laçin, Luftëtarin e së fundmi Lushnjën e Superiores. “Jam kthyer në shtëpinë time, te skuadra ime e zemrës, te dashuria ime e parë sportive, pasi ky ka qenë ekipi im më i dashur, edhe kur nuk kam luajtur këtu. Jam rikthyer pas kaq vitesh për të dhënë kontributin tim në objektivat serioze e maksimale që ka ekipi dhe jam i bindur që do t’ia dalim”, thotë ish-kapiteni i Apolonisë, Agim Meto, që rikthehet në Fier pas plot 7 sezonesh.

APOLONIA1

MEHMETI Gjatë miqësoreve të kësaj vere ka spikatur si shënuesi më i mirë i Apolonisë me 6 gola të shënuar. Por, mesfushori 19- vjeçar fierak duket se e ka marrë seriozisht “raportin” me golin, teksa shënoi edhe në ndeshjen e Kupës në Pogradec. “Pa dyshim që golat në ndeshje zyrtare të japin një tjetër ndjesi, afeksion të veçantë dhe kënaqësi të shumëfishtë kur skuadra fiton. Jam i lumtur për golin e shënuar, por më shumë për startin pozitiv që i kemi bërë sezonit në të dyja kompeticionet, sepse kështu duhet të jetë Apolonia: ekip fitues në çdo ndeshje. Ky është mentaliteti që këmbëngul fort trajneri ynë, por që i shkon përshtat edhe emrit të ekipit tonë”, deklaron mesfushori fierak, Ksement Mehmeti.

Bujar Rama






www.minuta90.com