Tomori apo Lushnja? Një çorbë e vërtetë është bërë dje për skuadrën e paratërinjve që ka fituar të drejtën për të luajtur në Kategorinë Superiore U-17. Deri në javën e 20-të, gazeta “Panorama Sport” rendiste të parën për Grupin B të Kategorisë së Parë skuadrën e Lushnjës. Verdhejeshilët e kishin siguruar matematikisht ngjitjen në Superiore një javë para fundit. Humbja ndaj rivalit direkt, Tomorit, në javën përmbyllëse nuk e rrezikonte Lushnjën, pasi kishte siguruar 47 pikë, ndërsa beratasit 43. Mirëpo, një gabim në sistemin e FSHF-së për renditjet krijoji një amulli totale, pasi rezultonte që Tomori ishte në vendin e parë. Dje, institucioni i futbollit sqaroi zyrtarisht se nuk është një trepikësh për Lushnjën, për ndeshjen e fituar në tavolinë ndaj Bylisit më 2 mars. Në këto kushte, Lushnja e mbyll kampionatin e para, me një pikë para Tomorit. Të premten lushnjarët do të luajnë finalen e U-17 për Kategorinë e Parë me Shkëndijën B. të Tiranës në kompleksin e Kamzës.
Reagimi – “Jam shumë i indinjuar për atë që ka ndodhur. Kam disa ditë që bëj llogaritë matematikore dhe në uebsajtin zyrtar të FSHF-së Tomori del në vend të parë me 46 pikë. Pas kontakteve që kam pasur pranë federatës, ditën e shtunë më është konfirmuar që e kam mbyllur sezonin në vendin e parë. Ndërkohë, sot (dje) informohem që është një gabim në tabelën e klasifikimit te faqja zyrtare e federatës. Është bërë një kolaps i vërtetë, pasi nuk dimë se ku ta gjejmë të drejtën. Nuk mund të trajtohen ekipet me dy standarde, shpresoj që të merren masa”. Ky është reagimi për “Panorama Sport” i trajnerit të Tomorit U-17, Santiljano Dule.

KATEGORIA E PARË U-17 / GRUPI B

Renditja	F	B	H	G+G-	P
1.Lushnja	15	2	4	47-21	47
2.Tomori	14	4	3	47-22	46
3.Vlora	13	3	5	43-23	39
4.Butrinti	10	5	7	32-26	35
5.Shkumbini	7	4	9	25-33	25
6.Luftëtari	6	3	12	28-35	21
7.Albpetroli	5	4	11	16-25	19

 

NDIQE LIVE "PANORAMA TV"

---