Kriza e Tomorit, trajneri Ziu dyshues për humbjen në Vlorë: Penalltia, është për t’u… parë
Tomorit nuk po i bën derman as trajneri i ri. Beratasi janë mundur edhe në fundjavën e shkuar, por kësaj radhe në transfertën e Vlorës me një penallti. Trajneri i Tomorit Febron Ziu pas ndeshjes për “Panorama Sport” pohoi se ka dyshime për penalltinë e Flamurtarit, që u shënua në fund të pjesës së parë.
Tomori pas 11 javësh kampionat ka vetëm 10 pikë dhe ndodhet në vendin e parafundit. Gjithsesi, shpresat për të dalë nga zona e rrezikut janë reale, pasi diferencat janë shumë të vogla mes skuadrave në renditje.
Febron Ziu ka pretendime për penalltinë e Flamurtarit. Në këndvështrimin e tij ai rast nuk ishte për 11-metërsh. “Flamurtari është një nga pretendentët kryesor për t’u ngjitur në Superiore. Ne jemi një ekip që po fillojmë të krijojmë një proces. Kjo ishte një ndeshje e komplikuar. Patëm edhe mundësi për të nxjerrë diçka pozitive nga ky stadium.
Ajo penallti është për t’u parë në fakt. Lojtari ynë nuk e preku topin dhe ishte në një vrapim me lojtarin e Flamurtarit, nuk e dimë se si do duket, por unë kështu mendoj. Ne u përpoqëm dhe futëm të gjitha forcat në sulm në këtë ndeshje. Flamurtari i mori pikët në fund të lojës. Do vazhdojmë të konsolidojmë ekipin për të marrë pikët që aq shumë na duhen”, tha trajneri i Tomorit
ERMAL SIKA- PANORAMASPORT.AL
NDIQE LIVE "PANORAMA TV"
