Taulant Marku është një nga lojtarët më të spikatur të Korabit, që edhe këtë sezon synon që ta sigurojnë biletën për në Superiore përmes fazës “play off”. Sulmuesi pukjan e tregoi veten me Korabin në ndeshjen e fundit në Fier ku kaloi në avantazh dibranët.

Por goli i 28-vjeçarit vlejti vetëm një pikë, pasi Repaj barazoi shifrat për Apoloninë në kohën shtesë. Për “Panorama Sport Taulant Marku ka folur në lidhje me ecurinë e ekipit dhe rolin e tij. “Korabi këtë sezon e ka nisur jo mirë, kjo për faktin se disa lojtarë erdhën shumë vonë në skuadër. Edhe dëmtimet kanë qenë arsye pse skuadra nuk arriti të ishte e plotë. Me kalimin e javëve ekipi u konsolidua dhe erdhi duke e rritur paraqitjen. Mendoj se Korabi ka kualitete dhe meriton të jetë më lart në renditje.

Të mos harrojmë se jemi i vetmi ekip që i kemi mundur të dy kryesuesit dhe kjo tregon që Korabi duhet të ishte më lart në renditje. Në aspektin personal, ndoshta ky nuk ka qenë viti më i mirë, pasi po luaj jashtë pozicionit tim natyral dhe e kam të vështirë të përshtatem. Ndeshja e radhës është mjaft e vështirë, pasi Flamurtarit ka një ekip shumë të mirë. Ne do e vlerësojmë maksimalisht këtë takim dhe në fushën tonë nuk duhet të falim më asnjë pikë”, u shpreh Taulant Marku.

SHKËLQIM HASANI-PANORAMASPORT.AL

NDIQE LIVE "PANORAMA TV"

---