Nesër në mbrëmje të gjithë sytë e botës do të jenë në Stamboll, në finalen e madhe të Championsit mes Mançester Sitit dhe Interit. Në prag të supersfidës, trajneri i zikaltërve Simone Inzagi ka dalë në një konferencë për shtyp.

“E dimë se çfarë loje duhet të bëjmë nesër. Siti është skuadra më e fortë në botë. Ata e kanë treguar në ndeshjet që kanë luajtur. Jemi krenar që kemi arritur deri këtu, do të bëjmë çdo gjë për të luajtur një lojë të mrekullueshme. Duhet të limitojmë gabimet tona dhe të bëjmë më të mirën.

Nesër do të jetë ndeshja e 57-ë për ne këtë sezon. Ka qenë një rrugëtim tepër i gjatë me 56-ë të mëparshmet. Kemi pasur disa momente të vështira, në të cilat ne jemi rritur më të fortë. Kemi shkuar nga humbje të merituara në humbje të pamerituara. Kemi bërë një përpjekje të çmendur dhe falë kësaj kemi arritur në Stamboll. Në kohët e fundit ne kemi pasur shumë pak kohë të mendojmë se çfarë kemi bërë. Arritëm të kualifikoheshim në Champions, një finale Kupe Italie për të cilën u kujdesëm shumë. Vetëm tani po e kuptojmë se çfarë kemi bërë. Nesër ne do të luftojmë deri në fund.

Mesfusha do të jetë shumë e rëndësishme. Por unë mendoj se këmbët, mendja dhe zemra do të jenë më të rëndësishme. Këmbët do të duhen për të vrapuar, mendja për të qenë e kthjellët dhe zemra për të gjetur energji në ato momente që t’i mendon se nuk ke më.

E dimë që nesër kemi një mundësi të madhe për të shkruar historinë. E dimë që do të jetë shumë e vështirë, por ne do të përpiqemi. Së bashku është fjala që na ka sjellë këtu dhe së bashku do të përpiqemi që të fitojmë.

Unë kam të njëjtën skuadër dhe jemi të qetë. Sa më shumë afrohet ndeshja, që më shumë rritet tensioni. Nuk i kam harruar ndeshjet në transfertë kundër Plzen, Barcelonës, Portos dhe Benfikës. Meritat shkojnë për lojtarët. Ne i detyrohemi dhe një shtysë të fundit tifozëve dhe klubit.

Jam shumë me fat që të drejtojë një grup me burra të vërtetë, që nuk do t’i ndryshoja për askënd. Skuadra që kam në dispozicion më jep mua një kënaqësi të madhe, që ja kemi dhënë dhe tifozëve e klubit. Djemtë po japin më të mirën në stërvitje. Mkhitajani dhe Korrea duken shumë pranë rikuperimit të plotë. Nesër do të kemi seancën e fundit stërvitore dhe aty do të vendosim.

Zhangu më quajti dhuratë? Jam i nderuar t’i dëgjoj këto fjalë. Ai i tha këto në publik ditën e djeshme, por gjatë gjithë rrugëtimit, madje dhe në momentet më pakë të lumtura, fjalët e tij më kanë dhënë forcë, të cilat unë ja kam përcjell stafit.

Mbrojtja ndaj Halandit? E dimë forcën e Sitit dhe atë të Halandit. Atë do ta kemi në vëzhgim të veçantë, ashtu si të gjithë lojtarët e tjerë. Kemi përgatitur diçka, i gjithë Interi duhet të luajë mirë që të kufizojnë Sitin.

Siti ka një mbrojtje solide, të cilët kanë pësuar shumë pak gola në Champions, ashtu edhe në Kupën FA. Ata janë të ndërtuar në një mënyrë tjetër dhe mbrojnë në një mënyrë tjetër. Ne do të përpiqemi që të luajmë një ndeshje që duhet luajtur në finale.

Penalltitë? Gjithmonë i kemi përgatitur ato gjatë gjithë vitit dhe do të stërvitemi sërish sot.

Do të ishte e rëndësishme për futbollin italian po të fitonin të gjitha italianet. Më vjen keq për Romën dhe Fiorentinën, të cilat luajtën dy ndeshje fantastike. Jemi këtu tani, pavarësisht si mbyllet ndeshja jonë. Mendoj se objektivi më i madh u arrit këtë vit. U bënë shumë vite që asnjë skuadër italiane nuk arrinte një finale europiane. Këtë vit arritën tre dhe ishte vërtet e mrekullueshme për futbollin italian.

Brozoviç apo Mkhitarjan? Unë nuk kam bërë shumë zgjedhje që në fillim dhe ne do të vendosim nesër.

Jam shumë me fat që të drejtojë lojtarë të cilët dinë si t’i luajnë këto ndeshje, ne nuk kemi asnjë lojtarë që ka luajtur finale Championsi ose dhe trajner. Por ne të gjithë bashkë kemi luajtur shumë ndeshje të rëndësishme. Ne kemi kampionë Europe dhe Bote. Kemi një miks mes eksperiencës dhe lojtarëve të rinj. Duhet të jesh mirë në menaxhimin e detajeve, ato e bëjnë diferencën dhe ne duhet të jemi mirë t’i menaxhojmë nesër”, tha Inzagi.

PANORAMASPORT.AL

NDIQE LIVE "PANORAMA TV"

---